Porterhouse：午餐．加推自助健盈沙律吧

晌中環返工，一到晏晝搵食真喺唔易，周圍都人山人海，不過，肯花點錢，又走高少少，就會搵到啲寧靜，又高質素嘅餐廳。最近，同舊同學聚一聚，到訪位處加州大廈提7樓嘅「Porterhouse」就喺一家講質素、環境好嘅餐廳。

走進餐廳嘅用餐區，好自然就會感受到當中嘅閒適，裝修摩登，極富時尚感，加上高樓底，偌大玻璃窗，讓天然光盡透入室內，令人醒神陣陣。

再者舒適嘅座椅，精緻嘅餐具，以及嚟嘅客大多數都喺斯文客、附近工作嘅OL，所以，氣氛比較幽靜，讓人感覺好舒服咁用餐。

午市主打喺套餐，分為兩道菜（$268）、三道菜（$298）、四道菜（$328），大類則分為自助健盈沙律吧、滋味頭盤、主廚精選及甜品，可惜嘅喺卻唔包餐飲。經店長介紹，原來之前嘅午餐喺無沙律吧一項，為吸引更多OL或想食得輕盈健康嘅客人，特別加推沙律吧。其實，呢個都好啱我架，不過，小弟嘅午餐時間有限，揀食沙律吧就會未能好好慢慢享受，故此，同友人都喺揀頭盤、主菜及甜品嘅三道菜組合。

如果覺得午市套餐唔喺好合心水，佢哋亦有提供散點，類別有沙律、前菜、煎魚、意大利飯、意大利麵、各式扒類，不過，但點睇，你都會覺得套餐喺划算好多。

自助健盈沙律吧

雖然無揀食沙律吧，但眼見有咁多款式，選擇豐富，都值得順帶介紹一下。話就話喺「沙律」吧，但都提供一款凍火腿俾大家揀，此外，仲有芝士盤、橄欖、數款沙律菜配3款醬汁、烤蕃薯、燒茄子、燒南瓜、炒野菌、螺絲粉、意大利蕃薯、牛油粟米粒……等等，外觀睇落好唔錯。其實，以OL嚟講，淨食沙律吧都好夠，唔知餐廳會唔會考慮一下，以一個較相宜嘅價錢只享用沙律吧+甜品嘅組合，嚟吸引更多OL客人幫襯呢？

麵包籃

坐低無耐，侍應就送上麵包籃，籃內共有3款麵包，包括意大利香草包、硬歐及香草薄片，配上自家製牛油，幾款包都各有特色。

滋味頭盤

頭盤共有4款選擇，但不得不提一提，其中兩款喺需要額外加錢，故此，我哋就揀咗唔使額外加錢嘅菜式。

冷菠菜湯

個凍湯非常翠綠，睇起嚟非常之靚，而湯面加咗少少鮮忌廉、煙燻油及榛子碎做裝飾，亦喺作為調和，令味道增加層次。小弟試咗一小口，感覺十分清涼，而且，唔似慣常嘅忌廉湯咁加入大量忌廉，所以，口感寧舍清爽，啱晒晌熱辣辣嘅盛夏中享用，舊同學就大讚個湯喇。

煙生牛肉薄片

小弟就選生牛肉作為前菜，賣相做得相當精緻，雖話生牛肉，但一啲都唔生嘅，經過煙燻，仲帶有少少鹹香味，口感亦非常軟熟，佐以芥末醬、火箭菜、巴馬臣芝士及烤麵包粒，味道甚具層次。

主廚精選

主菜方面一共有12款選擇，類別亦多元化，但講到招牌嘅就梗喺扒類啦，不過，同前菜一樣，部份菜式需要額外加錢，「Porterhouse」主打喺扒類，3款扒類就更加唔使講啦，唔介意付出多少少嘅朋友，當然要試吓。

煙燻烤蘇格蘭三文魚

舊同學想食得輕盈啲，揀魚類就最合佢心水，呢一道烤三文魚做得好精緻，而三文魚煎得四面都焦香誘人，更配上炒菠菜，佐以荷蘭汁及檸檬角。佢鎅咗一小件俾我試試，入口感覺真喺好唔同，肉質油潤細嫩，仲有煙燻嘅香味慢慢滲出嚟，唧啲檸汁，再沾少少酸香嘅荷蘭汁，食落油香得嚟卻喺全無油膩感，清爽嘅炒菠菜亦喺非常好嘅配搭。

澳洲和牛面頰肉

如果想佢哋啲肉類菜式，又唔想額外加錢，呢一道牛面頰超推薦，坊間不少地方都有做呢款菜式，但唔喺間間做得好。但今次遇再嘅牛面頰肉，堅喺好得，落刀已知有幾軟腍鬆化，極富肉香，內裡卻肉汁豐盈，就算唔沾上啲砵酒汁，件肉本身都好夠味；配以炒BB露簡、甘筍仔已好好，加埋啲超軟滑嘅松露薯蓉，整道菜真喺無咩好挑剔。

甜品

諗住兩道菜跟三道菜都喺差$30，心態上感覺試埋甜品喺划算啲。甜品嘅選擇唔算多，共3款。

意大利奶凍

晌奶凍及芭菲之間，最後揀咗奶凍，喺因為見餐牌嘅成份描述寫住有楓糖漿、西瓜、草莓及大黃，感覺新奇嘅組合。不過，嚟到就不如期望咁樣，賣相都喺好普及所見嘅意式奶凍配少少雜果晌面，幸而奶凍本身做得高水準，質感挺身而柔滑，極富奶香，睇到喺用上雲呢嗱籽去做，香味自然。

黑椒焦糖爆谷雪糕
軟滑富奶香嘅雪糕，晌夏日本已喺美味嘅甜點，不過話加入咗黑椒元素，感覺又唔喺太明顯；但加上焦糖味爆谷，實屬錦上添花，唯以之前所食到嘅前菜、主菜水平而言，兩款甜點都實屬過於平淡，欠缺一啲亮點。

熱檸茶 +$35
餐飲嗌親檸茶、檸水真喺無咩好寫，但自之前晌灣仔嘅「Odelice」食過餐午飯，就算非酒店級餐廳，一樣可以做得有誠意。單喺個茶壺已有啲話題性啦，非常有格調，茶底幽香，更配上一小粒榛子仁朱古力，值得加分。

熱咖啡 +$35

喺即磨嘅出品，仲有層咖啡油晌面，咪睇杯咖啡得3/4滿就話人慳皮，因為都要預你落奶嘛，細心位就喺啲鮮奶已打熱過，所以，加咗奶之後，咖啡嘅溫度啱啱好，唔會太熨口，亦唔會變成只得微暖，再者，啲豆應該喺有質素嘅貨色，入口醇香，帶點點果仁香氣。

環境有格調就唔在講，而食物嘅水準亦屬有質素嘅出品，好似冷菠菜湯、煙燻烤三文魚、牛面頰肉，都喺驚喜連連嘅菜式。招呼方面，熨貼有禮，上菜嘅速度啱啱好，不急不緩，而每個類別嘅菜式，都做到同步出菜，所以，整個用餐過程，都讓人感覺稱心。當然，值唔值就見仁見智，因為，始終有唔少菜式需額外加錢，加上午餐本身嘅定價亦非便宜。故此，小弟嘅攻略就喺最好揀兩道菜嘅午餐，選擇自助健盈沙律吧及主廚精選就超划算。

個人評分
味道：9/10
環境：9/10
服務：8/10
抵食：8/10
平均每人消費：HK$366

餐廳資料：
Porterhouse
中環蘭桂坊德己立街30-32號加州大廈7樓
2522 6366