話明想搵個舒服地方食晏，所以，民泰個環境附合小弟要求。黑白灰作為餐廳嘅主調，設計簡約而帶點點工業風，一邊白瓷磚牆上畫上巨型彩繪，添幾分藝術氣息。此外，餐枱、餐椅都闊落，上晒菜晌枱上都唔覺逼，坐落又幾舒服好挨，加上樓底都算高，空間感足。
食晏就自然喺睇午餐，有無得散點就無問唔知，不過，午餐嘅選擇都唔少，一共9款，定價$53-$98，豐儉由人，全部包餐湯及餐飲一杯。
仲有少少升級優惠，如+$12/$15轉特調咖啡或新鮮水果茶。
+$10可以額外配特色甜品一客。是日周六，加上剛啱大雨關係，客人唔算太多，臨尾食住甜品，慢慢傾，不知幾悠閒。
未講食之前，都仲想提吓佢哋啲餐具，因為，俾人嘅感覺喺一啲都唔「求其」，唔會喺大路貨色嘅白碟。全部嘅刀叉匙羹刻咗餐廳嘅名字，，平平無寄嘅湯碗配塊小木墊，感覺可以唔同晒，而最後嘅甜品，加隻原木木墊，又會有另一層次嘅感覺。
大蒜薯仔湯
是日餐湯只有一款，唔講就真喺以為迤做嘅例牌白湯，飲落滑溜而既有薯味，又有蒜香，喂！真喺唔錯喎，如果醒多片香蒜法包伴一伴就絕配啦！
煙三文魚牛油果藜麥沙律 $53
咁多款菜式，下下講求健康嘅老婆二話不說就喺揀沙律，因為牛油果、藜麥喺極富營養嘅食材，難得啲牛油果夠熟軟腍，配點沙律菜及煙三文魚，淋上少許油醋調味，簡單清新。不過，雖則作為午餐，但份量明顯都有啲少，女生應該都勉強夠，男生就肯定唔夠食。
西班牙海鮮鍋飯 $78
西班牙「大鑊飯」絕對喺西班牙菜嘅經典及代表，但傳統而言，「大鑊飯」真喺堅大鑊，但轉為單人份午餐，份量就因應縮番細而變得精緻的骰，唔喺以大鑊呈上，亦唔喺好似菜名咁以鍋上，不過，隻湖水藍瓷碟幾雅致。個飯嘅質素喺點？飯粒分明有咬口，有茄香而帶微辣，海鮮包括虎蝦、青口、墨魚仔、蜆肉，新鮮有質素，用料無欺場，尤其虎蝦同墨魚仔，前者爽彈，後者柔韌。最驚喜喺飯內加入西班牙「臘腸」，煙煙韌韌，鹹香惹味。
民泰四七全日早餐 $98
因為賣到$98，所以，有一定嘅期望，食過之後，覺得烹煮手勢了得，好似炒蛋做到好滑，大傘菇煎得香而多汁；用料方面亦甚具質素，就如煙肉唔會得個肥字，又唔會煎到過硬，香草豬肉腸皮脆肉香，又有巴馬火腿。可是，份量確喺偏少，擺出嚟無咗份震撼嘅感覺。既然以雞蛋仔代替烤多士，不如大方啲俾夠半底，甚至一底，望落有都睇頭好多嘛！
民泰水果茶 +$12
單點價要$48，叫午餐補$12就可以試到，表姨甥女就最喜歡飲水果茶。水果茶原壺熱住上，茶內混入唔少新鮮水果，過口癮小試一杯，果味都香，但可以講喺味道比較複雜，茉莉花茶茶底幾香。
蜜桃柚子茉莉花 +$12
呢款花茶味道比較單一而清啲，咪睇以為乜都無，其實喺有啲柚子肉，茶底清香而又確喺有點蜜桃香味，老婆就鍾意依款花茶多啲。
玫瑰咖啡 +$12
依12蚊真喺加得抵呀，先講個拉花，玫瑰咖啡拉番個玫瑰拉花，拉得幾細緻，亦頗花巧吓。入口口感均勻圓滑，每啖滲出幽香嘅玫瑰味，更托出醇香嘅咖啡味，掂！
莫加法式焦糖燉蛋 +$10
見佢+$10就有客甜品，問過仲喺莫加法式焦糖燉蛋，無理由唔搏啫。送到嚟仲有驚喜，先講賣相，陶瓷小杯配原木木墊，已經甚有文藝氣息。
初頭以為就咁得啲焦糖燉蛋，原來鋪咗好多脆口嘅栗米片，一羹插到底，連埋啲燉蛋放入口，好好食，層焦糖香甜薄脆，燉蛋香滑，但似乎朱古力味就重啲，咖啡味就唔明顯，但$10真喺超驚喜價。
雖然，今次嚟食晏所食嘅嘢唔喺太話好西班牙嘢，但所試嘅菜式都甚有水準，其喜愛佢啲餐具，服務又好，環境舒服，叫人稱心滿足。
個人評分
味道：8/10
環境：9/10
服務：8/10
抵食：8/10
平均每人消費：HK$110
味道：8/10
環境：9/10
服務：8/10
抵食：8/10
平均每人消費：HK$110
餐廳資料：
民泰四七 Man Tai 47
紅磡民泰街47號安榮樓地舖
2388 8843
民泰四七 Man Tai 47
紅磡民泰街47號安榮樓地舖
2388 8843
沒有留言:
發佈留言