Coffee Talks：牛油果．有營有款

一向都頗喜歡到訪一啲咖啡小店，因為非連鎖模式，家家都有其獨特之處，雖然，小弟對咖啡嘅了解都仲喺好有限，不過，就會頗留意佢哋做食物嘅誠意、心思。今日專登嚟到Coffee Talks，目的當然喺佢哋啲咖啡，此外，亦因為幾想試吓其牛油果菜式。

店面擺放咗少少植物，唔會太過誇張，簡單嘅點綴，其實，已可以引起出小店閒情嘅感覺。

走進店內，左右兩排餐枱配梳化椅，以簡單幾何立體形吊燈襯托，牆上起多組黑板，以粉筆手繪不同嘅食物，整體佈置予人好舒服嘅感覺。

一個人嚟嘅話，就建議坐近門口一排高腳位，落地大玻璃對住街景，睇住啲行人急急腳往來穿梭，肯定讓你更有一種漫活寫意感。

此外，牆上仲有唔少掛飾裝置，亦令小店更有悠閒氣氛。可能餐廳位處太子洗衣街一段，屬比較人流少嘅一段街，加上喺新開嘅咖啡店，暫未有太多客人光顧，少咗嘈雜聲，環境清靜，叫人更能放鬆。

既為咖啡店，餐牌都會比較簡單，幾頁紙睇晒，兩張食品，一張飲品。前者有英式早餐、沙律、漢堡、小食、意大利麵、意大利飯、比薩及甜品，想唔到都有咁多種類；後者則包括咖啡、朱古力、名茶、梳打特飲、乳酸沙冰、茉莉花水果茶。雖然有晒招呼、送餐，但喺最正就不設加一。

順帶一提，凡點主菜類食品，都有不少折扣優惠，如細份量少少嘅凱撒沙律$20、是日精選蛋糕$25……等等。

牛油果忌廉汁大蝦意粉 $108

餐牌中有數款以牛油果入饌嘅菜式，如小食、麵包、意粉、比薩，呢一款牛油果忌廉汁大蝦意粉較為有興趣啲，牛油果嘅表達喺用晌做醬汁方面，以牛油果做成忌廉汁掛上意大利粉之上，所以，意粉呈一片青綠色，意粉煮得咬口之餘，牛油果忌廉汁幾滑溜，微微牛油果香味，但入口又唔會太重身；而大蝦食得出喺新鮮貨色，並非雪藏嘢，既有蝦鮮味，又爽口彈牙，用料不賴。

牛油果蟹肉車厘茄比薩 $118

另一款牛油果菜式就揀咗比薩，因為配蟹肉，未食都覺得吸引。比薩目測應為8-9吋批，厚度為所謂薄批與厚批之間，一上枱時趁熱食倒問題不大，但攤涼咗口感就稍稍有點硬，影響整體食味。但不得不講，用料非常豐富，批面唔只鋪滿牛油果、蟹肉、車厘茄、蟹籽，原來芝士之下仲加入牛油果蓉，所以，每啖都充滿牛油果味，既有營，又好食。

點主菜類食物，可享有正價飲品減$10之優惠，我同友人都喺咖啡「粉絲」，店子起名叫「Coffee Talks」真喺無乜理由唔嘆咖啡囉。

鮮奶咖啡 $36（正價）/ $26（優惠價）

咖啡類飲咖有好多選擇，但今次就揀杯簡單啲。拉花尾對準杯身餐廳標誌，做對基本，再細看拉花，細緻、對稱、杯面無起泡泡，技巧上可以講有番咁上下水平，跟住晌唔同位置飲幾啖，口感一致，可見奶泡撞入意式濃縮咖啡手勢好，所以，小弟就好滿意杯鮮奶咖啡喇。

玻璃焦糖泡沫咖啡 $44（正價）/ $34（優惠價）

友人杯咖啡就更見心思，試就無試過，但朋友就讚不絕口，佢話晌意大利泡沫咖啡上再灑上少少沙糖，好似法式焦糖燉蛋咁燒燒，出嚟嘅效果已經好特別，篤一篤真喺好似有層玻璃焦糖。而奶泡打得滑身輕盈，咖啡飲落醇香有餘韻，靚豆亦應記一功。

既然有優惠，當然會用盡少少嘅，本應每日嘅特色蛋糕要賣$42，依家$25就加配到，今晚從餅櫃所見，有兩款蛋糕：朱古力咖啡芝士蛋糕（Mocha Cheesecake）及藍莓芝士蛋糕（Blueberry Cheesecake）。因為意粉加比薩確實好飽肚，所以，甜品點一客就夠皮喇！

朱古力咖啡芝士蛋糕 $42（正價）/ $25（優惠價）

雖然簡單一件蛋糕，都真喺無迤住就咁拎俾你，加少少擺設，唧上朱古力漿，賣相真喺可以好唔同。蛋糕由底而上，喺消化餅底、朱古力咖啡芝士、朱古力碎片，淨睇外觀已覺得唔錯，一試真喺有水準喎，消化餅底薄得嚟夠均一，中層嘅朱古力咖啡芝士質感軟滑，甜中帶點鹹味，咖啡味道中又隱約有陣陣芝士味，而餅面嘅朱古力碎片有畫龍點晴之效，令朱古力味突出番。嗒住杯鮮奶咖啡嘆依一件蛋糕，真喺正。

Coffee Talks唔知會唔會成為咖啡愛好者之間「有嘢講」嘅小店，但就喺小弟會推介俾愛好咖啡嘅老友，因為地點交通方面，但位處洗衣街，旺中帶靜，內裡環境非常寫意，牛油果菜式有心思，咖啡又沖調得出色，服務到位卻唔收加一，真喺每一項細分都值攞到高分。

個人評分
味道：8/10
環境：9/10
服務：8/10
抵食：8/10
平均每人消費：HK$155

餐廳資料：
Coffee Talks
旺角洗衣街167-175A號嘉德大廈地下2號舖
3705 3128 / 6999 0623