其實「椰林春天」主打喺椰子雞煲專門店，所以，晌門口見到大大張海報印住。淨做雞煲應該唔夠生意，尤其尖沙咀區，就算樓上鋪嘅租金都唔嘢少，況且，有幾多人會真喺晏晝嚟打鞭爐，所以，午市飲茶就成為主角。此外，佢哋仲供應埋小菜、泰式美食，實行大包圍。
睇個店名「椰林春天」，幻想會帶點馬來風情，餐廳佔3樓全層，地方非常之寬敞，只喺近窗有少少植物，故馬來風情就算唔得上，但一室柔和木系裝修，配搭舒適嘅藤椅，感覺悠閒，嚟到飲茶，慢慢坐，慢慢傾，就最好不過。當然，晌餐廳周圍加多啲綠油油嘅盆栽，就更顯得有馬來情調。
咪以為星期日午市無乜客，除本地客，眼見佢哋仲做旅遊團客，一批批韓國遊客嚟飲茶、食點心，不過，因為喺團客關係，快上快落得緊要，我哋啲點心都未上齊，批團客已經食完準備走，前後唔夠30分鐘。
同行朋友唔喺大食之人，加上其中一位仲有下場，同我哋嘆吓茶都喺攝時間，所以，叫啲點心食都夠晒，仲連炒粉麵都無叫添。無論點心，抑或炒粉麵，定價都唔貴，茗茶就$10位，另收加一服務費。
蝦餃 $6.8
雖然講到明優惠價只喺$6.8一籠，仲無限點幾多，不過，我哋都只喺叫咗一籠試試。啲蝦餃比出面啲蝦餃皇喺細咗隻啲，但一客3隻只喺$6.8，你仲想點！賣相唔失禮，餃皮夠薄，裡面填滿鮮爽嘅蝦肉，擺明喺蝕本價吸客之作。
鮮竹牛肉球 $15.8
一客同樣有3球，牛肉球搓得幾鬆化，更加入馬蹄粒增加口感，當然放多啲就仲好，此外，如果棄莧茜，下陳皮，就更合大家口味啦！
椰林秘製生煎包 $32
算喺店家嘅招牌推介，所以，點都要叫一客嚟試，生煎包以瓦鍋成個上，送到嚟仲感受到嗰股熱氣。翠綠色嘅包身喺因為加入菠菜汁做，不過，菠菜味就唔喺好覺，而底面都香過，所以，先有一陣香脆感，再咬覺得包身鬆軟，豬肉餡嘅肥肉唔多，整體不俗；鍋底有唔少紫洋蔥，有益好食，梗唔嘥啦！
頂級菠菜包 $15.8
試咗個生煎嘅，蒸嘅效果又會喺點呢？依度啲點心好興一籠3件，菠菜包都喺，其實跟食生煎分別唔算太大，只喺少份香脆感而已，不過，做得好就喺包身鬆軟唔黏牙。
上湯鮮竹卷 $20.8又喺一客3件，所以，份量絕非偶然。小弟就覺得依個鮮竹卷幾好食，因為上湯浸，外層腐皮部份好嫩滑，裡面包住豬肉、唐芹粒、粉絲，有咬口，味道真喺唔錯，而個上湯亦唔「馬虎」。
秘製叉燒腸 $20.8睇樣就見，腸粉皮拉得既薄且透，仲見到晒裡面有唔少叉燒，絕無欺場；腸粉皮雖然入口滑溜，但口感有些微削，而叉燒餡鬆化惹味，最好喺無乜肥豬肉，同行有膽固醇高嘅人嘛，就算少少哋都可免則免。
籠仔馬拉糕 $15.8
馬拉糕以原籠蒸，雖然表面有啲皺，但質感入口鬆軟有回彈力，味道上清甜而有蛋香。試咗多款點心，估唔到椰子雞煲專門店做嘅點心大家都讚唔錯。
除咗散點點心，我就覺得依個「午市文昌雞套餐」最抵食，應該4個人都夠殺。優惠價只賣$198，有半隻文昌雞，仲包小食、點心及粉麵，不過，問過經理，需俾番茶芥及加一，唯下午茶時段（2:00pm-4:30pm）嚟就有得免茶芥。
此外，豪少少可以考慮「午市優惠自選套餐」，就着人數有唔同選擇，分$298 (4人) / $498 (6人) / $598 (8人) / $868 (12人)共4款，多少人嚟都無問題。
晌星期六、日、假期，時間許可又再豪多啲，「午市任飲任食兩小時套餐」會唔會成為你嘅選擇，喺火鍋加小食、點心、飲品嘅任飲任食組合，同樣唔喺全包，需俾茶芥及加一。
最後埋單只喺$185，不過咁，今次人腳唔大食先食到咁嘅價，否則，加多客炒粉麵已經要俾多一截錢。總括嚟講，單以嚟食晏嘆點心計，價錢唔貴，舒服好坐，啲服務亦到位，店員亦有禮，至少無硬銷佢哋啲套餐，4個人都食唔過兩嚿水亦無黑面……等等。
個人評分
味道：7/10
環境：8/10
服務：8/10
抵食：8/10
平均每人消費：HK$50
味道：7/10
環境：8/10
服務：8/10
抵食：8/10
平均每人消費：HK$50
餐廳資料：
椰林春天 Coconut Grove Spring
尖沙咀天文臺道8號3樓
2866 0122
椰林春天 Coconut Grove Spring
尖沙咀天文臺道8號3樓
2866 0122
沒有留言:
發佈留言