DX Bakery：好友狂嚐曲（66）

曲奇呢店市場，不斷都有新店加入，最近友人送嚟一盒有4mix曲奇俾小弟，包裝外觀精簡，有點格調，品牌名字叫「DX」，似喺一個新嘅品牌，因為未曾聽過呢間店，感覺比較陌生。

再細心睇睇個包裝盒，原來喺Deluxe Bakery嘅出品，早前就啱啱試過其部份出品，感覺不俗。盒底印住官網網址，上去八一八，網頁設計比較簡單，不過就唔喺有見到有關「DX」的介紹。但友人就話喺想開拓年輕人市場嘅副線，為針對年輕人市場，故產品都偏向迎合年輕人嘅口味。

打開包裝，內有4層，每層都有12塊曲奇極齊咁排列，分別包括4種口味，其實，之後食落去，有啲喺有13塊一層，總之比盒底標明總數量48塊有多無少，跟住就同大家分享吓4款曲奇喺點。

堅果牛油曲奇

第一個印象就喺堅多堅果仁，曲奇內混入好多開心果、杏仁碎、腰果粒，所以，口味唔算咩新奇嘢，卻喺勝在極有口感，雖然牛油味唔算重，但曲奇本身十分鬆脆，此外，甜而不膩。

紫薯紅豆曲奇

比較期待嘅一款口味，以紫薯作為曲奇嘅口味，加入紫薯粒提升個煙韌口感，再配合紅豆嘅清甜，但似乎未做到預期，因為個人覺得紫薯味未夠突出，紫薯粒亦發揮唔到煙韌感，而紅豆粒咬落比較硬身。

奶皇松子曲奇

4款口味中，以依款較有驚喜，一入口好有種食奶皇月餅嘅感覺，好似有朕鹹蛋黃香氣咁，內裡混滿松子仁，但曲奇身就唔算好脆口，口感比較粉，但味道真喺好有趣。有杯中國茶一齊，就絕配喇！

比利時朱古力曲奇

睇個名就個賣點喺乜，唔喺吹水，朱古力好濃郁，帶少少苦味，甚有個性，曲奇本身好鬆脆，再加入朱古力粒，口感富層次，襯佢最好夾杯醇香嘅咖啡。

整體嚟講，牛油味真喺唔算好重，感覺會喺健康啲。幾款口味都做得有水準，但仲有啲改善空間，尤其個紫薯口味。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
DX Bakery
天水圍天秀路8號天一商城1樓1039號舖
2866 6285