不過，再走入啲喺用餐區，明顯如一般悠閒西餐廳。香港租金貴，就預咗枱櫈編排會有點逼，還好喺佈置有點心思，窗邊有唔少盆栽，枱上又有啲擺設，天花掛上電燈泡，讓整體環境添加少少氣氛，兩邊對外都喺玻璃窗，使空間唔會太侷促。
細細嘅餐牌似喺自家印製，啲字開始有啲甩，而菜式分為沙律、前菜、主菜、意大利麵或飯、甜品、西班牙小食及飲品。
另外，仲有兩個獨立嘅套餐餐牌，分二人（$368）及四人（$698），本來都有考慮點二人餐，因為認為划算啲，不過，部份嘢唔太啱我老婆，最後都喺散點。
飲品選項中，除啡茶、汽水、什飲、果汁之外，更有店員推介嘅無酒精雞尾酒（$58 / 杯），見其中一款加入牛油果，喺老婆嘅「飛弗」。
Zen $58
以牛油果、檸檬汁、蘋果汁，加上蜜糖打成嘅Zen，以闊口雞尾酒杯呈上，份量十足。睇落好似好杰身，其實入口又幾滑，牛油果本身唔重味，飲一口就會覺得檸檬同蜜糖味突出啲，老婆就讚幾好飲，感覺幾爽。
Energy Yogurt Shake $58
小弟所揀嘅乳酪奶昔，以乳酪代替牛奶，加入香蕉及蜜糖打成，再放少少穀麥做裝飾，依杯入口口感就真喺比較挺身，好重蕉味，因為加入蜜糖，所以，乳酪嘅酸味唔太重。
前菜只有3款選擇，包括風乾火腿、馬拉蜆及拼盤。因為數月前晌一家廠廈餐廳試過馬拉蜆，知道喺鮮味好食，所以，推介俾老婆試試，再者，佢偏向食素，紅肉會盡戒，所以，個蜆就更啱佢。
白酒煮美國馬拉蜆 $98
賣$98本身已經唔喺貴，仲要滿滿一碟，食完都無刻意數過，但估計有15、16隻左右。睇表面，除白酒，仲加入洋蔥、蒜蓉、香草、車厘茄去煮，所以，味道有層次。雖然馬拉蜆本身唔大隻，但蜆肉夠晒肉厚，入口柔軟鮮甜，滲出淡淡白酒香。
餐廳本身嘅小食冠以西班牙小食，不過，純睇款式及用料就有別傳統嘅西班牙小食，但定價於$58-$78，份量足，都喺抵食之選，我哋亦揀咗其中兩款。
檸檬海鹽炸甜薯 $58
依家都幾興炸蕃薯，我老婆亦鍾意炸蕃薯多過炸薯條。蕃薯炸到金黃，再灑上海鹽及香草，蕃薯條入口香脆唔油，蕃薯哋亦幾濃，甜甜鹹鹹咁，不過，檸檬汁應該唧得唔平均，有啲食到檸檬酸香味，有啲就欠奉，建議不如加又一件檸檬角伴碟，清新靚仔啲之餘，可以俾客人自行加添檸味。
芝士煙肉焗燒烤菇 $68
一客有兩大件大傘菇，實屬抵食，大傘菇入口好多汁，又有菇香，配以芝士同煙肉，香濃惹味，令大傘菇變得唔寡。
黑松露意大利飯配63°C溫泉蛋 $88
因為都點咗一客馬拉蜆加兩份小食，所以，主食就只點一道意大利飯就可以，因為，仲想留少少肚試甜品嗎！
個飯真喺煮得有水準喎，夠濕潤，又有黑松露香，飯粒有咬口，完全無生米嘅感覺，更混入唔少菌粒。而篤開隻溫泉蛋，啲蛋黃唔喺好流，似溏心蛋嘅狀態，反而我老婆更啱，佢怕比較太生嘅蛋，撈勻啲意大利飯一齊食，又有唔同風味。
最後，就梗要一客甜點作結先完整，原心水喺檸檬芝士蛋糕慕絲，但無晒貨，反而出咗款新新嘢「焗肉桂蘋果脆脆」，晌套餐餐牌都見有，問我哋有無興趣試吓，我一向喺蘋果批類嘅粉絲，當然OK啦。因為即點即焗，所以，需要等上10分鐘左右。
焗肉桂蘋果脆脆配意大利雪糕 $68
所配嘅意大利雪糕有3款口味可選：芒果、芝麻、雲呢嗱，老婆一聽有芝麻，就二話不說揀芝麻，不過，食嘅時間佢就覺得揀錯，芒果或雲呢嗱都應該襯啲。面層嘅金寶焗得脆口，甚富牛油香，而裡面嘅蘋果肉又軟又香，仲沾滿肉桂味，熱辣辣，真好食，一客夠晒兩三個人享用。
雖然環境有點擠，但啲座椅幾好坐，而且，啲服務真喺幾好，例如上蜆時加多隻骨碟俾我哋裝蜆殼，點焗肉桂蘋果脆脆時會提一提要等耐少少，上菜時又提醒小心碟熱，又不時添水，點完甜品更即時主動換上新碟及餐具，出面有啲餐廳真喺唔出聲唔會郁架。
個人評分
味道：8/10
環境：8/10
服務：8/10
抵食：8/10
平均每人消費：HK$270
環境：8/10
服務：8/10
抵食：8/10
平均每人消費：HK$270
餐廳資料：
Romanne Leisure Food Concept
旺角砵蘭街215號朗晴坊7樓
2312 2608
Romanne Leisure Food Concept
旺角砵蘭街215號朗晴坊7樓
2312 2608
沒有留言:
發佈留言