山區裡的走走趯趯: Little Creatures：杯中尋味

2017年3月31日星期五

Little Creatures：杯中尋味

啤酒，絕對喺小弟門外漢嘅領域，不過，幾杯落肚都還可以，只喺未識欣賞其精髓而已。不過，友人對酒就甚有研究，唔單止紅酒、白酒、威士忌，對啤酒亦有一定嘅心得，近年香港極流行手工啤，佢就嚐過不少，今晚小弟掹衫尾同佢嚟堅尼地城新海旁嘅Little Creatures見識見識。

聽朋友介紹，Little Creatures喺南澳頗有名嘅啤酒廠，落戶香港佢已經萬分期待。走進店內，絕對有點大開眼界嘅感覺，究竟喺啤酒廠？定喺餐廳？

樓底極高，而且，面積又長又深，地方非常之大而寬敞。由於顧客對象有唔少喺外國人，所以，就算啲4人卡座都寧舍闊落得多，兼極有氣氛。

一排牆身裝修都花咗唔少心思，用好多簡單物料設計出唔同嘅字款及圖案，頗有心思同趣味。

當然，最吸晴就應該落晌數個巨型釀啤酒缸身上，咪以為裝飾，喺堅運作中，由原材料發酵成啤酒，依個亦喺餐廳嘅景點位，唔少客經過都影番幾張相，所以，喺咪話佢又啤酒廠，又餐廳嘅模式好特別呢？

既然餐廳以賣啤酒為主，飲品餐牌中酒啤嘅款式故然特別多，但亦有餐酒及非酒精飲品供應。

Blood Orange Soda、LLB (Lemon, Lime and Bitters) @$30

小弟雖未至於滴酒不沾，但始終對酒唔太識欣賞，故揀咗杯LLB，以檸檬汁、青檸及
溝成，入口好清爽，伴啲濃味食身一流。友人嘅血橙梳打，喺意大利S. Pellegrino品牌，質素有一定保證，但友人略嫌佢淡口咗啲。

Beer Tasting Paddle $100

友人嘅必然選，不過，餐牌無標價錢，問問店員原來定價$100，仲打算以後會以此定價，而賣點喺一次過可試到6款不同特色嘅啤酒（每杯100亳升），絕對喺過足口癮，而評酒則交由老友代勞，小弟就勿班門弄斧獻醜嘞。

上啤酒時，晌特製杯托上已附有每款酒嘅名稱及資料，如酒精度（ABV）、苦味度（IBU）、色澤度（EBC），哈哈，依啲嘢小弟真喺識條鐵。但最見心思喺仲列出埋該款啤酒嘅特性，大可對比吓自己嘅舌頭準唔準，此外，更建議每款啤酒配咩食物為佳。

Original Pilsner（ABV4.5%, IBU40, EBC10）
Bright Ale（ABV4.5%, IBU30, EBC13）
Pale Ale（ABV5.2%, IBU36, EBC20）
House Brew（可稱為是日出品，次次不同）
Rogers' Amber Ale（ABV3.8%, IBU24, EBC35）
India Pale Ale（ABV6.4%, IBU60, EBC25）

評酒就唔在行，講食就啱我啲。餐廳供應嘅美食亦唔少，包括：餸酒用嘅小碟小食，共享嘅前菜、大盤、沙律、三文治、漢堡、薄餅、意大利麵、意大利飯及芝士。

Beetroot & Goat Cheese Salad $95

簡簡單單紅菜頭與羊奶芝士組合嘅沙律，不過加埋其他新鮮配料，淋上雪莉醋及灑下榛子碎，平凡中顯得不平凡，酸香醒胃中，味道變得更有層次。

Lime Chicken Tacos $120

再嚟一道墨西哥風嘅粟米餅，一客有4片口感煙韌嘅栗米餅，伴上烤雞肉，亮點就喺啲醬汁，墊底有綠色嘅牛油果醬，再加上帶微辣嘅酸忌廉，鍾馗意嘅仲可唧少少青檸汁嚟提算清新度，包好後一大啖噬落去，極之惹味好食，集酸辣香於一身。老友話一啖啤、一口粟米餅，爽到爆。

Pappardelle Bolognese $140

肉醬意粉呀，海鮮寬條麵呀……就食得多，但呢個肉醬寬「帶」麵就好有驚喜。首先，肉醬底就搵咗羊肉、牛肉、豬肉嚟做，感覺寧舍香濃，肉香中滲出微微羶香，刨下幾片半硬身嘅羊奶芝士Pecorino，更添香味；而Pappardelle喺極少見嘅意大利麵條，好似未有正式中文譯名，都喺晌網上見有台灣人譯為寬帶麵，跟寬條麵厚薄差唔多，但闊度有兩隻手指闊，甚具咬口。