居廬晉家門 Restaurant & Pub：亡羊補廬

太子嘅「居廬」，其實一直都想搵埋窩夫控嘅表姨甥女去試其窩夫，不過，講嚟講去都無行動，漸漸就無晒回事、懶得再諗。最近，聽朋友講，「居廬」晌附近開咗家賣意大利菜嘅餐廳，而窩夫依然有得食，所以，再次「的」起心肝搵埋佢一齊去試，訂位安排，一切由小弟搞，都喺舉手之「廬」。

初頭聽朋友提及店名時，仲以為改賣中菜，但就算查實喺賣西菜，門面、室內擺設都帶點中式化，如門前嘅牌匾、雕花窗框裝置、古代將軍油畫……等等；然而，佈局卻很西化，近門口位有大型共享長木枱，深啡色皮椅，又有大型水晶燈。感覺還好喺唔會有太大違和感！

此外，想必店主應該都幾喜歡花花草草，因為，無論餐枱上，抑或牆上，都放有各式各樣嘅小盆栽，為餐廳添上點點田園氣息。再者，樓底之高，使空間感十足，讓整體感覺會更好。

睇睇散點餐牌，選擇可不少，由湯品、沙律、前菜、小食、主菜、意大利麵、意大利飯、飲品、甜品，一應俱全。唯可惜餐廳未有晚餐供應，只作散點。

香蒜煙肉碎椰菜仔 $68 

晌小食一欄見到有椰菜仔，既可當小食，亦可以作為一道蔬菜菜式。雖然作為小食，份量可不少，然而，加咗香蒜及煙肉去做，誘發出嚟嘅香味唔算好強，我較鍾意將啲煙肉炒香晒先嚟煮，鹹香味會強好多；此外，個人覺得啲椰菜仔似喺烚過先再炒，除色澤變得唔翠綠之外，口感亦有過腍問題。

太平洋黑虎蝦意大利粉配海鮮蕃茄汁 $138

依道意大利麵就做得頗出色，蕃茄汁底十分鮮活，酸爽香濃，配合煮得啱啱好，有咬口嘅意大利麵，淨食個意麵已不俗。而兩隻虎蝦甚有睇頭，相當大隻，開邊香煎後，雖然無話彈牙到飛起，但入口不失爽口，蝦味足。

自家製馬鈴薯丸配黑松露忌廉汁 $178

記得晌上環嘅「Upper Modern Bistro」食晏，所選嘅主菜伴有意式馬鈴薯丸子（Gnocchi），喺一種稍稍冷門嘅意大利麵類嘅食材，因為市面似乎都無現成貨，都喺要靠自家製。今晚見餐牌有此選項，當然好想點嚟俾表姨甥女試試。

一客意式馬鈴薯丸子被預期多，再者，佢食落喺會幾飽肚，而個丸子煮得有水準，口感既粉粉糯糯，煙韌咬口，粒粒都掛滿汁；個黑松露忌廉汁又做得非常幽香，黑松露味甚突出，好鍾意佢哋仲刨咗啲巴馬臣芝士落好，香味更提升。

未上表姨甥女一直期待嘅窩夫，先嚟介紹吓飲品先，咖啡選擇非常多，此外，仲有花茶、梳打、果汁、汽水……等等。

玫瑰花茶（每壺）$45

配花茶套杯非常典雅漂亮，而浸泡出嚟嘅玫瑰花茶，卻無想像中咁有玫瑰花香，我哋心想會唔會浸泡得唔夠耐？所以，第二杯喺浸泡較長時間嘅成品，但個玫瑰味同樣無預期中咁幽香，入口比較淡而薄，我哋再研究吓，見佢茶底外，放嘅喺原粒玫瑰粒，或許喺浸得散唔開，啲味未能盡放。

拿鐵 $34

配甜點，拿鐵喺小弟嘅心水，杯面泡紋比較多，拉花圖案亦簡而不夠細緻，入口亦缺乏均勻感，依啲都喺關乎沖泡嘅手勢問題；但最失望喺朕咖啡味，入口有啲怪怪，唔敢斷定喺咪炒燶豆，但都喺第一次遇見，已即時向店員反映，讓佢哋了解番個問題，從而可以改善吓。

甜點只有4款選擇：芝士蛋糕、兩款窩夫及拿破崙蛋糕，唔使多心，一早就打算喺點窩夫嘅，就算有兩款，亳無疑問會揀用店家名命嘅款式。

晉家門自家製窩夫 $78

用得店名，相信會喺招牌款式，唔上枱一刻都未知喺乜，原來喺士多啤梨口味，水滴型窩夫，配上新鮮士多啤梨、忌廉、士多啤梨雪糕，唧埋士多啤梨糖漿，非常亮麗。上枱時，個窩夫幾香，入口亦好鬆軟，蛋香味唔算好強，但最驚喜喺入面加入紫薯蓉，而啲士多啤梨十分鮮甜，個雪糕球亦好軟滑，富奶香，整體個窩夫頗出色。

小食嘅椰菜仔、拿鐵，無疑喺失手之作，但兩道意大利麵及窩夫，卻喺有水準嘅出品，所以，打總分有啲難。不過，環境舒服，空間感強，而且，服務又好到位，見店長亦不時問客人意見，亦耐心聽我哋「發噏風」，所以，整體印象還是不俗，但正所謂亡羊補牢，未為晚也，希望能作出針對性改善，使出品更好。

個人評分
味道：7/10
環境：8/10
服務：8/10
抵食：7/10
平均每人消費：HK$200

餐廳資料：
居廬晉家門 Restaurant & Pub
太子基隆街119號地舖
2338 8224