其實，晌十多年前已有唔少酒吧聚集晌太子近旺角警署周邊，可能貪佢夠皇氣，諗住相對少啲人搞事啩。不過，印象中嗰時啲酒吧都喺雜啲，只賣酒，啲嘢唔好食，但近年啲酒吧再唔喺「無啖好食」，之前亦曾光顧過一啲做菜有水準嘅酒吧餐廳。
叫得酒吧餐廳，格局就梗喺以酒吧為設定啦，幽暗嘅環境，節拍強勁嘅音樂，高腳枱櫈，都喺指定嘅標籤，整體氣氛唔錯。
餐廳尾牆上仲有大型投射器屏幕，不斷播放音樂短片。
墨西哥粟米片小食 $35
甫坐低，侍應先送上脆口嘅粟米片，伴有自家調製嘅香草酸忌廉，一邊食，就一邊度吓點咩菜。
翻翻餐牌，由於環境確實昏暗，餐牌影出嚟嘅效果麻麻，所以，今次就無整體餐牌俾大家當參考，只有個別菜名相。而菜式選擇，主要分為沙律、西班牙小食、薄餅、主菜。
另一個飲品餐牌，羅列各種酒精及非酒精類飲品，好老實，表哥都極少蒲吧，佢亦唔喺好飲得，所以，推介佢試試啲非酒精雞尾酒。
Virgin Mojato $68
因為一陣都會食啲炸嘢、重口味嘢，所以，介紹佢飲依杯Virgin Mojato，因為以蘋果汁、糖漿、青檸汁、薑味汽水溝成，再加入薄荷葉，清涼之餘，仲帶微微薑味，好啱配今晚所點嘅菜式。
Charm Around $68
小弟喺芒果粉絲，故自自然然點咗以芒果、蘋果汁、糖漿、紅石榴糖水打成嘅Charm Around，入口芒果味都幾濃郁，雖然加入兩款糖水，但唔會甜得太漏。
餐廳中央位置唔止喺吧位，吧位後更喺開放式廚房，廚師人手非常足，遠距離睇住佢哋做菜，不斷煮菜、上碟，甚有團隊隊形。
古羅馬凱撒沙律 $68
同依個大表哥都幾夾、幾傾得埋，大家都喺食肉獸，故今晚所點嘅菜式主要都喺肉，所以，先嚟一道沙律平衡吓。凱撒沙律可選配香草雞肉或煙三文魚，喺好傳統做法，醬汁拌勻爽脆冰涼嘅羅馬生菜，配上煙肉碎，撒上芝士粉，煙三文魚鹹香油份足。
脆炸樹皮配松露 $62
初時被佢個菜名吸引到，究竟咩喺炸樹皮呢？睇菜牌嘅英文喺菇菌嚟，再問問侍應，原來喺將啲菇菌刨成薄片再酥炸，出嚟嘅效果真喺有幾分幼身嘅樹皮，配上幽香嘅松露，啲「樹皮」香脆到不得了，真喺一片接一片喺咁食，唯略嫌油咗少少。此外，咪以為成兜滿晒，其實下面墊有少少沙律菜。
西班牙香燒乳豬仔 $72
真不愧為招牌菜式，印象中預計喺一件件乳豬仔，但估唔到配搭見心思，以百吉包墊底，加上青瓜片、乳豬件、車厘茄，一來味道無咁單調，二來食落無咁油膩，而且，啲乳豬非常香脆。細心位更見啲百吉包烘過嚟，咬落脆口，又灑下少少香草發辣粉提昇味道層次，值得推介嘅西班牙小食。
西班牙鴨肉春卷 $78
試完款乳豬仔，實在好食，跟住再試試另一款Tapas新嘢「鴨肉春卷」，賣相夠晒豪華，用個雪茄盒嚟上枱。一客有4條，春卷炸得香脆，入口一啲都唔油，內裡塞滿鴨肉，帶點鴨酥香，點黑椒碎又得，沾沙律醬都得，Duck咗！
西班牙啤酒燴慢煮牛面肉 $148
主菜類我哋只揀一款，就喺依客招牌菜嘅牛面肉，不過，餐牌喺寫$148，但出面鋪面個牌就$138，希望店家更正吓，免發生誤會。經過慢煮嘅牛面肉肉質非常軟腍嫩滑，富肉香，底下仲墊有唔少茄子，不過，話個汁加入啤酒去煮，可能個汁都喺燒汁底，味道比較濃，小弟又唔喺太覺啲醬汁有好突出嘅啤酒味，但仍然覺得好襯個牛面肉。
地道墨西哥雞肉卷 $72
其實我都有9乘飽，但表哥極為欣賞佢哋啲菜式，再追加一客墨西哥雞肉卷，原來佢未食過墨西哥嘢。個雞卷賣相就無咩特別，但就搵咗個日式藤籃裝住，有啲搞鬼。個墨西哥薄餅皮煙煙韌韌有咬口，雞肉亦唔嚡，仲交足貨，卷皮內好多雞肉、沙律菜、燈籠椒……等等材料，非常有口富，雖然唔知個醬汁用咗咩，但帶微微辣，極之惹味香濃。
想搵好嘢食，都唔一定要睇電視啲咩美食頻道，嚟到「第三西班牙小食頻道」都一樣可能搵到美食。所以，依家啲酒吧做菜嘅水準都唔可以小覤，往往有意外驚喜。
個人評分
味道：8/10
環境：8/10
服務：8/10
抵食：8/10
平均每人消費：HK$370
味道：8/10
環境：8/10
服務：8/10
抵食：8/10
平均每人消費：HK$370
餐廳資料：
Channel 3 Tapas Bar & Restaurant
太子通菜街228號地下
2390 9286
Channel 3 Tapas Bar & Restaurant
太子通菜街228號地下
2390 9286
沒有留言:
發佈留言