北海道牧場餐廳 Hokkaido Dairy Farm Restaurant：我的星期六美孚早餐 ~ 牧定口呆

北海道牧場餐廳只曾光顧過尖沙咀店（已結業），然而，對其印象麻麻，所以，就算美孚開咗分店都有大半年，都一直未有幫襯，況且，對比同區嘅快餐店及茶記都貴一乘至乘半，真喺幫襯嘅誘因唔大。今次之所以到訪，都喺差唔多食勻美孚嘅餐廳早餐，就走入去試吓！

其實，坐滿人之後，餐廳環境都幾逼，不過，可能樓底夠高，裝修帶少少歐陸風，感覺都唔差。

先到出面櫃位點餐後，拎住號碼牌返位等，再由店員送餐，不過，負責收銀嘅女店員態度就真喺麻麻，叫人目定口呆，反而送餐嘅妹妹仔就頗有禮貌。另一方面，啲客普遍鍾意將啲號碼牌擺埋一邊，搞到啲店員送餐時好似玩「捉迷藏」周圍搵。

早餐分咗多款系列：特色早餐系列、出前一丁早餐系列、烘焙早餐系列、熊本蕃茄湯系列，一共20多款選擇，不過，部份款式都喺左拼右拾。

B4. 秘製沙嗲牛肩胛3.6牛乳炒蛋通粉早餐 $36

秘製沙嗲牛肩胛通粉，個名就改到好似幾勁，但跟預期有啲落差，湯底只喺不過不失，有沙嗲味，但就唔算好香，秘製之名都喺誇張少少，而牛肩胛肉跟食一般牛肉亦唔見特別高質。唯一讚吓喺啲3.6牛乳炒蛋確喺炒得幾嫩滑，內裡仲帶有少少蛋漿，而烘多士搽牛油亦無點迤搽。

B17. 火腿3.6牛乳炒蛋蕃茄湯通粉 $36

老婆一向喺蕃茄湯通粉嘅支持者，佢又偏向食素，所以，揀個最簡單嘅配火腿，而火腿就梗喺又由小弟處決啦！個蕃茄湯底算做濃郁，但感覺缺少咗份鮮活感，可以講喺不過不失，幸而通粉無煮過腍嘅情況。3.6牛乳炒蛋同樣炒得有水準，火腿喺大路貨色嘅水準，但至少唔似喺大陸貨嘅霉火腿。

熱檸水、熱咖啡

餐飲揀熱檸水、熱咖啡，前者就無咩好講，除非迤到得兩三片檸檬啦；後者應喺落咗3.6牛乳，所以，色淡之餘，奶味相對重，幸好咖啡味都唔太削弱到。

北海道牧場餐廳晌香港紮根都好多年，雖然，睇個名好日式，但啲早餐出品就好港式，食物嘅水準多年嚟都似乎無點提升過，感覺亦無乜點變化，猶如亳無「牧」標，得一日過一日嘅餐廳。

個人評分
味道：6/10
環境：6/10
服務：6/10
抵食：7/10
平均每人消費：HK$36

餐廳資料：
北海道牧場餐廳 Hokkaido Dairy Farm Restaurant
美孚蘭秀道1-15號美孚新邨第五期地下9號舖
2370 8527