抵食之道，就喺瞄住啲優惠菜式、乜乜孖寶，加上喺生日飯，當然要點得豐富啲。因為細妹有敏感，蝦蟹類可免則免，所以，先選一份「孖寶3」：貴妃雞 + 蒸元貝（$168）。
另有一個簡便餐牌，印咗啲燒味、廚師推介小炒，亦有晌報紙賣廣告嘅優惠菜式「晚晚優惠您」，一共有4款選擇，幾好嘅喺可以同時享用，無話限點幾多款，不過，我哋較有興趣喺條蒸海石斑同精選燉湯，因為兩者都喺家人喜愛嘅菜式，再者，前者寫到明有斤半重，買條靚魚都要咁嘅價啦。
此外，仲有一個主餐牌，有啲咩就唔多講，都喺海鮮、前菜、湯品、小炒、飯麵……等等，影出嚟俾大家當個參考。點多個細佬至愛嘅咕嚕肉，一道浸菜苗平衡吓，再加多碟豉油皇炒麵作單尾，以4個人計，絕對好夠食。
貴妃雞（孖寶價）
散點要$78半隻，夾埋個蒸元貝，孖寶價慳到廿零蚊，雖然唔叫好多，但都當打咗個九折。碟雞望落好似好乾咁，但食落又唔差喎，鹹鹹香香，脾位肉質好滑。
蒜蓉粉絲蒸元貝（孖寶價）
堅多蒜蓉，而且，啲帶子都頗大隻，帶子肉好厚身，喺有少少蒸過籠嘅感覺，因為啲肉口感未夠爽，但晌惹味嘅蒜蓉下仍嗒到鮮甜味。補充句，如果散點，就要$28隻。
精選燉湯 $18 / 盅
屋企人好鍾意飲湯，所以，一定會點一客湯品，既然燉湯做優惠，由平常散點$28一客，依家只喺賣$18，當然要一人一盅啦。啲燉湯好足料，西洋菜、雞腳、赤肉、南北杏、紅棗……等等，入口好清潤、好順喉。
蝴蝶蒸海石斑 $68
依道菜非常多人點，因為我哋算坐近廚房門口，見久唔久就出一、兩客，的確喺抵食嘅，因為睇睇我哋依碟，絕對足斤半；雖然唔喺起雙飛「蝴蝶蒸」，但蒸得啱啱好，骨位都無黐肉，而且，肉嫩味鮮，絕無欺場！
脆皮咕嚕肉 $65
睇落麻麻，食落都麻麻，味道其實OK嘅，個甜酸汁都校得唔錯，不過，脆皮就欠奉，肉排啲肉質都比較實。
濃湯松耳浸菜苗 $68
單睇份量，就不得不講句大堆頭，份量足，菜苗採用翡翠苗及銀芽，兩樣爽口嘢搭埋自不然食落爽脆；而上面鋪上大量木耳絲及蟲草花，夠晒健康，配濃湯，確喺幾好嘅素菜菜式。
豉油皇炒麵 $68
抵食夾大件絕對唔喺單一事件，個炒麵堆到成座山咁，好大碟，炒得比預期好，乾身唔油，又唔會炒埋一炷炷，掂喎。
茶介$10位，計埋加一服務費，埋單$600加個零頭，難得又煮得幾好食（除咗個咕嚕肉），服務又快手快腳，招呼唔差，以今次表現值得俾個讚佢。
個人評分
味道：8/10
環境：7/10
服務：8/10
抵食：8/10
平均每人消費：HK$150
環境：7/10
服務：8/10
抵食：8/10
平均每人消費：HK$150
餐廳資料：
稻香 Tao Heung
深水埗大埔道222-230號快樂大廈地下及一樓全層
8300 8139
深水埗大埔道222-230號快樂大廈地下及一樓全層
8300 8139
沒有留言:
發佈留言