Candies Foodies：歡聚一糖

首先認識Candies Foodies喺從飲食雜誌嘅一篇報導，喺話幾個熱血青年搞嘅西餐小店。店主之一仲喺上海生煎皇個老版Oscar，加上，事前睇過好幾個晚市食評，都讚不絕口，所以，專程嚟試試，不過，只喺嚟試試其午市套餐，睇睇午市又如何？

朋友又喺去完北海道，所以，歡聚一堂，食餐晏之餘，順便交收吓手信。餐廳雖然位處舊商廈二樓，但從樂道一眼見到其鋪位，又有直屬樓梯上餐廳，不過，樓梯非常斜，上落要小心。

上到餐廳，環境幾舒服，裝修雖然簡約，以木系枱櫈為主，但見到擺咗唔少得意擺設，花咗唔少，好似巨型皮禮士糖公仔。

此外，近門口柱位，有一大個糖果箱，問清楚後，喺讓客人隨意享用，咁就明白點解店名叫「Candies」。

午餐共有6款選擇，有沙律、意大利麵、意式燴飯、魚類、豬肋骨同肉眼，定價介乎$72-$128，仲包餐湯及基本餐飲，另加$20可轉為特色飲品，以尖沙咀區而言，定價合理。

椰菜花忌廉湯

喺今日嘅餐湯，其實，感覺上椰菜花忌廉湯比較少採用，大概原因喺色澤做出嚟無咁靚，會啡啡黃黃咁，不過，味道唔錯，幾清，都好有椰菜花味，不過，只喺一小「杯」，兩啖飲晒，份量偏少，伴片小法包感覺更好。

巴馬火腿、雞肉蕃茄汁意式燴飯 $78

單睇買相個意大利飯比較乾身，入口感覺都唔太理想，太乾之外，亦無乜蕃茄香味，同埋見好快就上到菜，懷疑個飯喺咪煮定再加汁燴一燴。此外，配雞肉真喺覺得唔夾，而且雞肉切等粗，口感嚡，反而啲巴馬火腿好啲，夠油潤甘香。

白酒慢煮龍脷、菠菜田螺介子雲吞 $98

慢煮不嬲喺保持食材原味及新鮮度嘅好方法，但放入「香潺潺」嘅龍脷，被人覺得好似白烚，加上無乜白酒香氣，慢煮個做法個人覺得嘥晒；但喺粒菠菜田螺介子雲吞好好食，菠菜蓉刴得幼細，田螺口感柔韌， 其他配菜就普普通通。題外話，雲吞做成鑽戒形，喺咪應該用「戒指」呢？仲有，兩道主菜上枱時都唔夠熱，只喺微暖，亦喺要改進嘅地方。

餐飲只包普通啡茶，見佢哋有啲健康特色飲品，原價$42，食午餐就可以+$20以優惠價享用。

陽光、綠里 +$20

餐牌都已經列明有咩成份，「陽光」喺以青蘋果、菠蘿、士多啤梨、香橙、芒果溝成，喺一杯特色雜果汁，賣相非常有陽光氣息，不過，朋友話麻麻，只喺有種死甜嘅感覺。至於小弟杯「綠里」，則以4重蔬果打成，包括喺青瓜、西芹、奇異果、青檸，喺一杯特色蔬果汁，味道較清新，以西芹味為主導，帶點酸，感覺唔錯。

真喺唔知喺個人口味定大廚一時失準，抑或自己帶住期望嚟，嘢食唔喺話難食，只喺比預期有頗大落差，所以，臨走都無心去夾啲軟糖嚟食。

個人評分
味道：6/10
環境：8/10
服務：8/10
抵食：7/10
平均每人消費：HK$120

餐廳資料：

Candies Foodies
尖沙咀樂道36-50號華源大廈1B-2B閣樓
2563 3332