SKY726：Sky美早午餐

香港好多大廈都有名有姓，但彌敦道726就真喺得門牌，無大廈名，所以，印象有啲深，而此處非第一次嚟，之前曾到訪過7樓嘅樂農及18樓嘅Doux，今次攀到頂樓嘅SKY726，一嚐其周末早午餐，講到依度，就知店名來由喇。

一出電梯就喺餐廳，餐廳佔大廈全層，當然最正喺左邊窗口位啦，雖然只喺市內樓景，但感覺廣闊開揚，加上喺大廈頂樓，望出去處處都喺人家嘅天台，有種居高臨下嘅感覺。

而用餐區設置晌以中間為酒吧嘅四周，右邊有少少高腳枱櫈，以飲酒嘅格局為本，其他枱櫈則以用餐為本。水泥地，灰與黑作主色調，牆身、唔同角落都有唔少噴畫，裝修更顯型格。

我哋本來打算嚟簡簡單單食個午餐，原來，餐廳逢星期六、日喺做緊個Weekend Brunch，以Course1,2 3自由組合，定價為$148-$238 +10%，大可因應自己食量作取捨，例表如下：

Course 1 + 2：$148
Course 1 + 3：$188
Course 2 + 3：$198
Course 1 + 2 + 3：$238
另包甜點及基本餐飲，亦可額外加錢升級其他餐飲。結果，我哋選咗2+3（$198）及1+2+3（$238）組合。

Course 1有兩個選擇，一喺就是日餐湯加雜菜沙律，一喺就鮮雜果沙律，可以睇為頭盤類。

是日餐湯、雜菜沙律

原來除咗湯及沙律，仲有一個小穀麥包。南瓜湯睇起嚟唔錯，滔起一羹質感感覺杰身咗少許，但入口不失柔滑，南瓜味頗突出。

小穀麥包微微暖，包身非常鬆軟，配上油醋，簡單襯一襯就可以喇。

雜菜沙律只喺混入橄欖油嘅沙律菜及乾蕃茄，算唔得話好精彩，但清新富田園氣息，用嚟開開胃已足夠。

Course 2有三個選擇，分別喺雜莓醬窩夫黑松露炒蛋及賓尼迪蛋，依幾個選擇有少少難形容喺咩分類。

雜莓醬窩夫

窩夫賣相雖然簡單，但下了唔少鮮果醬，食得出喺新鮮製。窩夫做得唔錯，烘得脆口，內裡卻仍然軟熟，只喺略嫌有少少烘過火，混上鮮果醬及忌廉，酸爽不俗。

賓尼迪蛋

除少許沙律菜伴碟，仲墊有鬆餅及煙火腿，漲卜卜嘅水煮蛋淋上橙黃色嘅荷蘭汁，外觀就做得好吸引喇。手起刀落，蛋漿即時湧出，溝勻荷蘭汁，夾埋鬆餅、煙火腿一齊食，味道先喺酸酸甜甜，跟住有煙火腿嘅鹹香，好有層次感。

Course 3可以稱為主菜類，共有6款選擇，分別喺全日早餐、漢堡、長通粉、意大利麵、比目魚及西冷，不過最後兩者需另加$30。

卡邦尼長通粉

依家食卡邦尼有時喺加埋水煮蛋，有啲則無蛋版本，小弟無考究邊個版本先喺正宗，不過，個人就較鍾意有蛋嘅版本。個長通粉口感煙韌掛滿汁，卡邦尼汁質感濃稠，內裡又有唔少煙肉及菇菌，整體好食。

香煎比目魚配檸檬牛油汁 +$30

另一道主菜要咗比目魚，伴菜有法邊豆、焗串茄及炸薯角。比目魚柳煎得外皮香脆、魚肉滑溜，檸檬牛油汁好匹配個魚柳，清新帶香氣；啲法邊豆唔喺就咁白烚，喺蒜蓉炒，串茄亦焗過，可見啲細節位都有花過唔少心思。

藍莓芝士餅

甜品雖然唔喺咩特色嘢，只喺藍莓芝士餅，但已做到應有水準，紅色士多啤梨漿劃花墊底，以士多啤梨及藍莓做裝飾，賣相已交足基本功課；薄薄嘅消化餅底，濃郁嘅芝士糕心，鮮活嘅藍莓果蓉，鹹與酸嘅融和，識食嘅話，一定食得出當中嘅水準。

Cafe Latte +$15

食甜點，還是襯杯鮮奶咖啡最合心水，不過，奶泡打得好多泡，所以，拉花都難以拉得細緻，而口感較似意大利泡沫咖啡多過鮮奶咖啡，因為奶泡真喺好厚，未能飲出細膩綿密嘅口感，還好咖啡嘅香醇味唔差。

Chamomile +$10

友人要嘅洋甘菊反而有少少驚喜，一款名叫Mighty Leaf品牌嘅茶包，睇落並非普通嘢，茶袋內加入少少橙皮，所以，味道有少少酸及橙香，不過，個人就覺得洋甘菊嘅茶味薄咗啲。

今次午餐食得好豐富，晌秋日暖陽之下，曬入嚟嘅陽光唔太刺眼，仍有些微暖意，感覺非常悠閒舒服，一頓佳美嘅午餐，除咗食物好，環境舒適自在亦喺好重要。

個人評分
味道：7/10
環境：8/10
服務：8/10
抵食：7/10
平均每人消費：HK$230（折扣優惠）

餐廳資料：
SKY726
旺角彌敦道724-726號25樓
2390 3889