不過，未到7:00pm已經有唔少客，見有啲枱仲被放上「留座」牌子，真喺生意唔錯咁，其實，附近有幾個屋村、屋苑，客源應該唔使太擔心。餐廳嘅格局頗得意，由於有啤酒及餐酒供應，所以入門口位附近設咗個酒吧區，更有一排吧位，不過，又另有兩張二人餐枱，如果吧位坐滿晒，唔知坐入面餐枱嘅客人點出入呢？
其實，餐廳嘅面積都唔細，一室長條木地板，紅、黑、白牆身，掛咗唔少巨型食物照，配以木枱木櫈，裝修較摩登；最好喺樓底超高，空間感十足。而全部枱櫈都可以自己郁動，所以2、4、6、8人嚟都配合到，當然，超過6個人嘅時候，一字長枱傾偈就無咁方便。
由於經過門口時，見到啲水牌，晚市套餐平平哋都只喺六、七十，望入去環境又唔錯，所以，抱着不妨一試嘅心態。
翻閱一轉餐牌之後，俾人嘅印象會喺較大眾化嘅西餐廳，所提供嘅食物類別包括：前菜、沙律、湯、甜品、意大利薄餅、主菜、扒類、意粉及飯、全日早餐……等等，感覺似乎會喺少咗啲吸晴亮點。此外，有啲升級配套，如+$15配是日餐湯或田園沙律或啡茶、+$20配意式泡沫咖啡或特飲、+$25配各式芝士蛋糕或法式焦糖燉蛋。
亦有兩款二人晚餐（$318 / $338），主菜有麥香脆豬手、西班牙黑毛豬扒、安格斯西冷……等等，喺幾划算嘅選擇。
主餐牌外，仲有一個「廚師推介」菜牌，正正就喺門口所見嘅水牌，K1-K9共9款菜式，定價都喺$58-$98，奉送是日餐湯，可加錢自選成為套餐，+$15配田園沙律或配飯 / 意粉，+$18配精選甜品，+$20配特色咖啡 / 鮮榨果汁 / 是日餐啤酒。
至於飲品方面，除基本嘅咖啡、奶茶、檸水……之類，仲有特色咖啡、沙冰、特飲。
順帶一提，相信喺最新推廣嘅星級餐飲優惠，無論午餐、下午茶或晚餐時段，+$20可享用指定飲品，+$28可享用指定飲品及雪糕。雖然無試到，但相信當中嘅綜合鮮果汁最上算，皆因以鮮果打汁，點都真材實料啲嘅。
意大利雜菜湯
小弟揀主餐牌嘅虎蝦意粉，估唔到都照送一客是日餐湯俾我，因為見佢餐牌內無寫，以為無咋。個意大利雜菜湯好足料，酸香濃郁，味道唔錯，只喺嫌佢落得太多意粉，其實，我覺得意大利雜菜湯唔落意粉仲好。
鮮茄羅勒虎蝦意粉 $71
大大隻虎蝦，搵少少翡翠苗襯托，賣相吸引，件虎蝦絕對好有睇頭，而且，有好多蝦膏，但肉質唔算好彈牙，個人感覺有少少煎過火；然而，啲意粉煮得啱啱好，食落有咬口，而且，撈勻鮮茄醬，又有羅勒香，內裡更有唔少茄肉同菇菌，再者，睇見碟意粉就知好大碟，認真抵食。
初時諗住加錢升級配飲品及甜品，不過，甜品只喺得芝士蛋糕或法式焦糖燉蛋，反而，見到佢枱面有個蛋糕餐牌，當中嘅法式蒙布朗蛋糕較吸引到我，同樣，可以+$15配即磨咖啡，+$20配特色咖啡。雖然共有8款蛋糕，但是晚大多數都缺貨，例如宇治抹茶芝士蛋糕、法式蒙布朗蛋糕（朱古力栗子）、意大利芝士餅都無晒，好彩仲有一款心水嘅：法式蒙布朗蛋糕（白朱古力）。
法式蒙布朗蛋糕（白朱古力） $38
最心義喺較傳統朱古力栗子口味嘅法式蒙布朗蛋糕，既然無貨，退而求其次點咗白朱古力口味，但有水準喎，底層朱古力海綿蛋糕底好鬆軟，中心喺朱古力慕絲，挺身得嚟好軟滑，更有少少朱古力碎添，而外層就喺一條條嘅白朱古力慕絲，入口柔滑，亦比想像中少甜。
焦糖咖啡 +$20（單點正價$25）
真喺嘥咗廿蚊，因為杯焦糖咖啡似杯意大利泡沫咖啡多過一杯鮮奶咖啡，濃縮咖啡底都算喺香濃嘅，但就真喺咖啡還咖啡，奶泡還奶泡，完全唔喺以奶泡撞入啲濃縮咖啡度，入口唔綿密，所以，更加拉唔到花。
除非睇書、睇雜誌或上網搵食，有時偶然碰上一間餐廳可能都喺一種緣份，當然碰上好嘅，喺一份良緣，相反，碰上伏嘅，就喺孽緣；題外話，電影「緣份的天空」（Sleepless in Seattle , 1993年），由湯漢斯及美琪賴恩主演，喺一齣細膩溫情嘅劇情片！
個人評分
味道：7/10
環境：8/10
服務：8/10
抵食：7/10
平均每人消費：HK$142
環境：8/10
服務：8/10
抵食：7/10
平均每人消費：HK$142
餐廳資料：
Sky House
荃灣海霸街22號華達樓地舖F號
2466 7277
Sky House
荃灣海霸街22號華達樓地舖F號
2466 7277
沒有留言:
發佈留言