Cafe Siam：炎夏泰清新

啱啱放完大假返公，面對大堆大堆文件，真喺要搵啲好嘢嚟彌補吓，所以，事前一早約定好朋友食晏。地點揀番上少少，因為德輔道、皇后大道一帶真喺多人到不得了，相反，蘭桂芳大部份食肆都會靜局少少，讓人食得輕鬆啲，故此，相約朋友到Cafe Siam食餐午飯，聚一聚傾吓偈。

餐廳位處樓上，但地下有大大個招牌，更有侍應晌地下接待，唔怕朋友會搵唔到。原來，餐廳佔兩層樓，然而，每層地方唔太大，不過，裝修卻喺幾骨子，有唔少「古物」擺設，多添幾分泰式風情。

友人話食咩都無所謂，故由小弟發辦，原來餐廳有午餐供應，亦非常實惠，定價只喺$99-$138 +10%。

不過，人總喺貪新鮮想試新嘢，見佢張餐枱墊有幾款新菜式，好奇試試喺咩味道，加上圖片印刷精美，更加份外吸引。

本來都無打算點嘢飲，但翻翻餐牌時，見啲特飲幾特別，又吸引，大嘅50、60蚊杯，所以，部份人就點杯特飲品嚐吓。

士多啤梨特飲 $58

友人嘅特飲從餐牌所見喺以士多啤梨果肉、香蕉、士多啤梨汁加冰打成，賣相嬌紅鮮艷，似沙冰嘅感覺，士多啤梨味非常突出，反而香蕉味較隱若，但友人仍然覺得好飲。

清甜荔枝椰子冰 $58

小弟就鍾意以荔枝襯椰子嘅組合，由椰青、荔枝汁、椰奶打成冰嘅清甜荔枝椰子冰，更以椰青做盛器。荔枝跟椰青水嘅味道幾平衡，入口冰涼透心，超啱晒依家大熱天時飲，爽到爆呢！

炸軟殼蟹青紅蘋果沙律 $138

先點一客沙律開開大家胃納，就嚟一客新菜式嘅青紅蘋果沙律，青紅蘋果切成幼絲，口感豐富，淋上泰式嘅羅望子醬汁（問我點知？小弟未至於食得出喺羅望子，只喺餐牌寫明啫），所以，酸酸辣辣，帶點酸爽，又帶點刺激，感覺唔錯。個人就覺得炸軟殼蟹唔算好襯個沙律，但啲炸軟殼蟹又炸得幾好食，唔太油。

燴羊仔腿配馬沙文咖喱汁 $188

比較期待嘅菜式，賣相亦非常有睇頭，咁大件幾個朋友共享就最好不過喇。而燴羊仔腿肉質都算燴得軟腍，羊羶味唔重，並伴以薯仔及西蘭花，個馬沙文咖喱汁亦調校得幾香。

布吉香辣炸鱸魚柳 $238

幾道菜，以依碟炸鱸魚柳最討大家歡心，除咗啲魚柳炸到皮脆肉嫩，又配以香辣嘅濃汁，辛香惹味，又富多層次嘅香料味；最重要原來條魚已起晒啲魚肉，切成魚柳件炸好再放返上去，所以，食起嚟超方便。

精製泰國椰子冰條配香芒黑糯米 $78

可以講喺傳統泰式甜品椰汁香芒黑糯米嘅新演繹，以椰子肉、汁做成雪條，椰香味十足，又啖啖椰子肉，冰涼爽快；再加上清甜嘅芒果肉及軟糯嘅黑糯米，灑上炸脆嘅椰子絲，甜甜蜜蜜，實在好食。

埋單時，店員順便話餐墊上嘅新菜式喺夏日限定，其實六月已經推出咗，暫定做到八月底，提我如果想介紹朋友嚟試，記得趁早。

個人評分
味道：8/10
環境：8/10
服務：7/10
抵食：7/10
平均每人消費：HK$280

餐廳資料：
Cafe Siam
中環德己立街21號The Plaza 2-3樓
2851 4803