早前同老友到訪過尖沙咀Goobne Chicken，嗰時嘅總結喺「烤雞的確唔錯，烤得出色，韓式雞蛋卷更深得我心，值得翻兜再嚟！」最近，從食友嘅食評得知佢哋有新店落戶荃灣，更喺小弟常出沒嘅區域，所以，約埋舊同事一齊嚟嘆番餐，兼傾吓來年去旅行嘅事，夾夾時間睇吓成唔成行，講旅行嘢就最開心，真喺傾到雞喙唔斷。
因為有上次尖沙咀店嘅經驗，知道佢哋好人氣，超多人等位，所以，稍稍避咗最旺嘅午市，我哋1:30pm先過嚟攞位，不過，都要等10min先有位。由於餐廳晌商場中庭位置，超開揚，裝修主要以木系為材料，襯以白色為主調，光潔鮮明。
較入嘅位置，更佈置成一個半開放式木屋，睇落又幾得意。但個人覺得，枱櫈嘅編排有點逼，其實，上次尖沙咀店都有此感覺。
睇睇張紙餐墊，除咗荃灣新店，原來佢哋已經開到去馬灣，真喺估佢唔到！
餐牌同樣保持揭頁式，印刷精美，圖文並茂，每款菜式都有簡單介紹。而主打嘅烤雞一共有12款供選擇（$140-$188），此外，仲有年糕、魚糕湯、鍋巴湯、雞蛋卷、雞爪、豬肋骨、沙律、雞串、豬蹄……等等。
海鮮鍋巴湯 $190
一份鍋巴沙啱唔好分到4大碗，不過，鍋巴就只得3件，老友讓我食一整件，先淨食煙韌而帶脆口，再沾湯，軟軟腍腍；而個海鮮湯雖然只標示1隻「辣椒」，但入口辛辣刺激，又幾鮮味，湯內有大蝦、魷魚、蜆肉，再伴點菇菌、小棠菜，材料豐富，整體而言，味道真喺唔錯。
蘋果檸檬醬汁香蒜烤雞 $168
烤雞嘢感覺都喺熱氣、濃味，所以，先揀一款佢話以蘋果、檸檬做醃料嘅烤雞。金黃帶些微焦香嘅烤雞賣相實在誘人，餐枱早已放好膠手套，以手拿住嚟食就最有氣氛，大啖大啖咁食亦喺最過癮嘅食法，外皮香脆，雞肉嫩滑，不過果香味個人就覺得唔算重，反而蒜香味出啲。可以加重多啲蘋果蓉去醃，甚至淋個薄薄哋嘅蘋果醬，伴碟更可擺半個檸檬俾客人自用添加檸香。
蜜糖咖喱烤雞 $168
上次晌尖沙咀店試過依一款烤雞，覺得配搭有特色、味道具層次，所以，真心推介俾佢哋試試。正如上次所講，蜜糖襯咖喱個效果真喺好唔錯，有啲似日式咖喱咁，唔會太辣太重，配以蜜糖嘅甜蜜香味，再食都覺得佢好好味；況且，雞件烤得金黃，入口外脆內嫩，熱辣甘香，已經喺成功咗一大半啦。補充，烤雞附送酸蘿蔔，一小碟唔夠喉，喺可以再添，當然食到幾多添幾多，唔好浪費嘥嘢啦。
食品外，飲品真喺唔可以唔大篇幅少少介紹，因為大大杯嘅Rita系列，闊口巨型大酒杯夾住枝有汽果酒或啤酒，睇得人份外過癮。
Shark Blood Rita $78
友人揀咗非酒精嘅「鯊魚」，佢話飲落甜甜哋，似藍莓，但睇個色小弟就難以想像喺藍莓味，不過，炎炎夏日，睇到海洋藍嘅賣相，友人就話齋望都覺得有股涼意。
Somersby Apple Rita $88、Corona Rita $88
前者唔多介紹，因為上次已試過，食評都有介紹，以Somersby有氣蘋果酒混入梳打水，感覺清新又帶蘋果甜味，梳打汽泡令入口清爽。小弟今回就試咗後者，以4.6%酒精度嘅啤酒Corona加入梳打度，其實，可以講喺溝稀咗嘅啤酒，非常易入口，啱啲唔好啤酒又貪得意過吓啤酒癮嘅朋友，就正如小弟，食住烤雞，扮晒隊啤。
餐飯去到尾聲，我哋都講咗將來有興趣去嘅地方，有長途，有短途，但講嚟講去竟然都無提及過韓國，韓國除炸雞、韓燒……，仲有好多美景啊，好想睇睇韓國嘅秋葉呢！
個人評分
味道：8/10
環境：8/10
服務：8/10
抵食：7/10
平均每人消費：HK$240
味道：8/10
環境：8/10
服務：8/10
抵食：7/10
平均每人消費：HK$240
餐廳資料：
Goobne Chicken
荃灣楊屋道1號荃新天地一期地下G29號舖
2157 1131
沒有留言:
發佈留言