Layers Bakery：層出不窮

近日，從網上接觸到一家新嘅甜品網購店Layers Bakery，從其FB嘅介紹：以「重塑甜味 The New Sweetness」為標題，把世界各地的特色材料、獨特的甜點味道帶回香港，並期望透過製作不同的甜品，味道重新演繹，以更迎合港人口味，令人好有期待嘅感覺！

而店家嘅最新搞作喺「七國之甜Cupcake」，喺將耳熟能詳嘅味道重新演繹，配合杯子蛋糕，製作出7款別具風味嘅個性甜點。

順帶一提，貼心嘅「手挽」設計，兩邊手挽一抽就可以輕易將杯子蛋糕全部抽出。

而7款口味嘅杯子蛋糕包括港式黑芝麻流心、日式宇治抹茶、泰式Pina colada、英式Apple Crumble、瑞士Lemon Meringue、意式Tiramisu及比利時朱古力。咁多款特色口味，又點可以獨食呢，所以，上到二表姐屋企同佢哋一家齊齊分享。

​雖然話就話一齊分嚐，但都唔喺一次過試晒，我哋先試其中3款。

瑞士Lemon Meringue $22

感覺喺眾多口味之中最輕怡嘅一個，初時仲以為面層喺一貫杯子蛋糕所採用嘅忌廉唧花，落刀嗰吓就知唔喺，而喺焗蛋白嘅「馬令」，入口輕盈脆口，滿有驚喜；而蛋糕底亦有心思，糕心加入檸檬果醬，酸香鮮活，整體甜酸交融，喺水準之作。

意式Tiramisu $22

意大利芝士餅一向喺小弟喜愛嘅甜點之一，做成杯子蛋糕，唔知效果如何？面層嘅馬卡風芝士漿做得挺身而柔滑，既有咖啡香，亦有酒醇，跟起鬆軟嘅蛋糕一齊放入口，芝味稱心。

比利時朱古力 $22

食嘢嘅常理定律，就梗喺淡至濃，所以，我哋最後一齊試嘅喺朱古力，以54%可可所做嘅1朱古力蛋糕底，再配合以70%可可調製嘅朱古力忌廉，絕對喺朱古力死粉嘅必然之選。果然，無論忌廉餡，抑或蛋糕底，朱古力之味濃郁到不得了，甘甜醇香，忌廉又做得幼滑細緻，好食。

大家一齊嚐過依頓小下午茶，就留番港式黑芝麻流心及泰式Pina colada俾佢哋慢慢噗。有好嘢又點可以唔預老婆一份，所以，帶走另兩款：英式Apple Crumble及日式宇治抹茶，作為是日飯後甜點。

英式Apple Crumble

外表比較平實，無一般杯子蛋糕做到咁花巧精細，不過，卻非常有內涵，皆因唔只蛋糕面有炒香過嘅鮮蘋果粒，蛋糕內亦散布少少蘋果果肉，而且蛋糕食得出滲有少少玉桂香，確喺富心思嘅出品。

日式宇治抹茶

最後所試嘅宇治抹茶，唧花非常細膩，入口柔滑，並富抹茶嘅甘香；而蛋糕心又做咗流心效果，抹茶醬徐徐流下，蛋糕同樣鬆軟，更富茶香，可謂雙重抹茶滋味。

雖然未有試足7款，但從所品嚐嘅5款杯子蛋糕中，都領略到當中嘅質素；而且，有別一貫杯子蛋糕經常出現嘅毛病，就喺好睇唔好食，佢哋嘅杯子蛋糕晌賣相上確實無咁花巧，但味道絕對上乘。見佢哋仲有其他產品，如瑪德蓮蛋糕、檸檬蛋白批……等等，店名叫Layers Bakery，就期待更多「層」出不窮嘅甜點。

個人評分
味道：9 /10
環境：- /10
服務：- /10
抵食：8 /10
平均每人消費：HK$0（試食邀請）

餐廳資料：
Layers Bakery
葵芳永恆工業大廈1205室
5239 1305 / 2587 7339