茶木‧台式休閒餐廳：賞心悅木

啱啱六月尾、七月初放咗個大假，因為有排都未有大節日，親友嘅大家庭聚會最快要到中秋先搞，所以，約表姨生女食餐飯，兼幫手分發吓少少手信。茶木原來喺佢同朋友嘅飯堂之一，哈哈，啲嘢實啱佢食啦。

好彩嚟得早，之後有唔少客等位，不過，人流都算快上快落。晌門口位，一眼就可以望晒餐廳，個場都幾深，一室白磚牆，再配木系裝修，加點盆栽或植物擺設點綴，營造出一份台式小清新，整體予人感覺舒服自然，觀感光猛俐落。

眾所周知，茶木主打台灣嘢，不過，選擇其實唔少，詳細就唔講，貼上餐牌目錄，就知大概有咩選擇。

培根爆椰菜花 $58

先嚟一道濃香重味嘅爆椰菜花，喺新產品，睇落好似好辣咁，其實辣度唔重，頗惹味，而椰菜花火烚得剛好，爽爽哋，又軟身，少少煙肉嘅鹹香提味，效果唔錯。

TeaWood 紅燒牛肉麵 $72

冠以店名，必定喺信心之作，一客牛肉麵份量可不少，3大嚿牛展，又有牛筋，配以大大件甘筍，甚有睇頭。牛展炆得軟腍尸，咬落鬆化芳香，當然香濃嘅牛肉沙底功不可沒，而甘筍清甜，咁啲麵條又點先？麵條屬筋性低嘅粗麵條，口感富嚼勁，如想爽口彈牙就唔喺你杯茶喇。

花枝麻醬麵 $70

試一客湯麵，有比較另一個主食就揀試撈麵，花枝切成絲，放晌麵中差唔見佢唔到，先淋下大半碗麻醬撈勻，因為啲麵條本身有少少黏，撈勻啲醬汁唔單味道好啲，啲麵亦唔會黐埋一嚿嚿。麵條煙韌咬口，沾滿麻醬，好香濃。

宇治抹茶奶蓋 $33

奶蓋帶出嘅意思喺有一層厚厚嘅奶泡，跟抹茶攪勻，表姨甥女話幾得喎，既有抹茶嘅甘香，又富有柔滑嘅口感。

黑糖胚芽奶茶 $30

台式飲品一向都合我口味，黑糖類更喺我嘅心水。奶茶嘅茶底都OK，有茶香，加入咗黑糖，感覺就更沉香，胚芽喺健康嘢，加咗唔會令味道好咗，但多咗啲粒粒口感。

鮮芒果義式冰淇淋奶酪 $42

依度最出名嘅甜品喺蜜糖吐司，既然講得喺表姨甥女嘅飯堂，佢食依度嘅蜜糖吐司可能兩隻手都數唔晒，所以，我哋就試試冰淇淋奶酪。即喺雪糕加布甸，前者芒果味雪糕，頗幼滑，伴以新鮮生果，好清甜；後者牛奶布甸，水準唔錯，軟滑而富奶香。 

對上一次去台灣食地道牛肉麵喺晌高雄（老宋牛肉麵）但都已經喺2010年前嘅事，年尾有無機會安排一次寶島之旅呢？

個人評分
味道：8/10
環境：8/10
服務：7/10
抵食：8/10
平均每人消費：HK$170

餐廳資料：
茶木‧台式休閒餐廳
旺角西洋菜街1號兆萬中心17樓全層
2267 9477