Sense Dessert Cafe：Common Sense

工作再忙，飯都喺要食，老友都喺要見，所以，是晚相約好耐無見嘅朋友聚一聚，談談近況，講講工作。地點、日期、時間由佢定，但日子就一拖再拖，食乜嘢嘛？我倒喺無乜所謂，最緊要喺唔趕客走，又唔太嘈吵嘅餐廳就可以喇。

位於佐敦嘅Sense Cafe處於內街，感覺比較清靜，小店格局，環境裝修簡約，一室杏啡色配襯，平實得嚟幾舒服。

牆上寫有一系列嘅新菜式，亦可以話喺餐廳推介嘅特色菜。

此外，另備有一份鹹點餐牌，如全日早餐、漢堡、意粉、沙律、湯品和小食。

當然，朋友講話餐廳以甜品起家，所以，仲有多款唔同系列嘅甜品供應，如意大利芝士餅、牛乳布丁、梳乎厘、心太軟、雪糕焗脆格、法式窩夫、份子創作甜品……等等，不過，有部份已經暫停供應。

西班牙紅蝦刺身沙律 $138

因為曾經晌一間西班牙餐廳食過紅蝦，覺得幾唔錯，所以，今次再想回味一下，就點咗牆上其中一款新菜「西班牙紅蝦刺身沙律」，不過，上到枱就不自覺覺得瀨嘢，因為將紅蝦切片再壓成一大塊薄片，變咗形態，但又算不上份子料理。切一小片放入口，蝦味雖然不俗，但有啲濕漉漉嘅感覺，蝦應有嘅爽口感又無晒。

芝士梳乎厘焗飯配西班牙黑毛豬架 $158

梳乎厘+焗飯依個組合頗有新意，是晚所見有4款口味（$138-$298），所以，揀個平價少少嘅西班牙黑毛豬一試。個「梳乎厘塔」有別一般甜品嘅梳乎厘，放耐咗都無塌落嚟，而鎅開啲梳乎厘就見到啲焗飯，不過，我哋點嘅喺松露牛肉醬汁，但嚟咗蘆筍蘑菇，同友人都唔介意就由佢照要。個焗飯其實做得唔錯，仲加有芝士，飯粒分明甘香，只喺個人覺得變成梳乎厘還梳乎厘，焗飯還焗飯而已；至於件黑毛豬架，肉味確喺濃，又醃得香，亦富肉汁，但有欠鬆化。

點任何食物（湯及小食除外），所有飲品都有半價優惠，所以，點可以唔點番杯凍飲，尤其依家外面咁鬼熱。

焦糖香蕉咖啡 $38

友人話佢杯咖啡唔錯，而我嘅焦糖香蕉咖啡又如何？賣相挺有心思，將焦糖化嘅香蕉以花瓣形放晌杯面，我就喜歡將啲咖啡跟忌廉搞勻，令到杯凍啡更香滑，而啲蕉再浸浸咖啡先食，既有焦糖脆，又有咖啡香，整體真喺唔錯。

席間講開旅行嘅事，咁啱友人原來稍後時間亦會去，所以，順便做咗佢行程指導，喺咪好應該請我食番餐呢？然而，今餐未有預期咁理想，變得普通，喺揀錯菜式嗎？

個人評分
味道：6/10
環境：8/10
服務：7/10
抵食：7/10
平均每人消費：HK$185

餐廳資料：
Sense Dessert Cafe
佐敦廟街286-294號華至大廈地下6-8號舖
2886 0949