樂天皇朝 Paradise Dynasty：自甘墮樂

之前樂天皇朝推廣緊個新加坡風味菜，話做到10月尾，但原來依家都仲有做，而且仲做到年底，而八色小籠包依然為人所津津樂道，所以，好易讓人自甘墮「樂」。為免等位，早啲到就最實際，閒日7:00pm前時段嚟，多數都唔需要點等。

樂天嘅背景，餐廳嘅環境，菜式嘅選擇，上一次食評都分享咗好多，所以，就讓小弟立刻去片，分享更多美味。其實，鋪面外近窗嘅卡位我就覺得最開揚，又有樓下街景景觀，不過，被其仔人望住晒感覺無咁好啫，坐入面就相對較自在。

原味小籠包 $52 

所有小籠包都有分6粒或10粒份量，而原味6粒份量賣$52，10粒份量則賣$80。相比之下，有啲人覺得原味無咩特色，其實正正可以試出基本嘅功夫，皮薄多汁，肉鮮味香，摺口工整，相當有水準。

皇朝小籠包（八種口味） $88 

上篇食文都分享咗唔少，容讓小弟偷懶一吓，今次就唔多講喇，簡單一句，水準依舊無走樣。

蘿蔔絲酥餅 $34 / 3件 

鍾意食蘿蔔絲酥餅皆因外皮入口鬆脆甘香，而內餡軟綿清甜，一嚟就兩客蘿蔔絲酥餅，絕對滿足。火熨得熱辣嘅酥餅，認真要慢慢食，外皮的確做得出色，油香鬆脆，而蘿蔔絲甜美多汁，猶如外表剛烈，內裡柔情嘅女生。

撈伴海中寶 $68 

熱辣辣過後，撈伴海中寶可以俾大家一個及時嘅涼快，以海蜇、鮮蝦、魷魚、青瓜絲，拌以蔥、蒜蓉、紅椒及醋汁所做嘅一道涼菜，用料豐富，而且質素不賴，食時要將所有材料撈勻，海蜇跟青瓜口感爽爽，魷魚柔韌有咬口，鮮蝦亦都鮮甜，整體味道酸中帶辣，惹味開胃，叫人食得開懷嘅冷盤，不過，食到近尾都幾辣。

芥末蝦球 $118 

4款新加坡風味菜式仲包括香濃咖啡骨、喇沙海鮮拉麵 ，以及下面分享嘅辣椒蟹肉豆腐。一客芥末蝦球有6隻，外表青青綠綠，就算加咗一片芒果肉及少少蟹籽上面，仲喺有種靠嚇嘅感覺，但實質啲芥辣唔喺咁攻鼻，惹味易入口；而蝦球既大粒，又彈牙，真喺幾有個性嘅一道特色菜。

辣椒蟹肉豆腐 $68 

另一道新加坡風味菜辣椒蟹肉豆腐，睇落又好似好辣咁，其實辣度適中，只喺一點點刺激。豆腐質感十分嫩滑，汁茨酸香微辛，豆腐之上撒上蟹肉絲，感覺有點隨意，未知如果將蟹肉釀入豆腐再泡油去做，一咬先爆出蟹肉絲，會唔會更有驚喜呢？

檸檬蘆薈桂花蜜 $26 

來一客檸檬蘆薈桂花蜜，唔單止清一清味蕾，更可一潤喉嚨，桂花蜜入口清潤，滲出幽幽檸檬清香，蘆薈滋潤養顏，更增加整個糖水嘅口感，好有一種輕盈清涼嘅感覺。

客似雲來大抵反映出一間店有幾成功，而成功都倚靠好多因素，例如環境嘅舒適度、食物嘅特色、食物嘅味道、服務……等等多環。樂天皇朝一直都做得唔錯，尤其食物嘅水準，保持上佳之作。

個人評分
味道：9/10
環境：8/10
服務：8/10
抵食：8/10
平均每人消費：HK$190

餐廳資料：
樂天皇朝 Paradise Dynasty
銅鑼灣波斯富街99號利舞臺廣場6樓
2177 0903