山區裡的走走趯趯: 2/3 Dolci：溫馨歡渡，共嚐甜蜜！

2014年11月20日星期四

2/3 Dolci：溫馨歡渡，共嚐甜蜜！

聖誕將至，又喺商家、食肆各出奇謀嘅日子，當然，唔少甜品店都會乘時推出應節蛋糕或甜品，近日就得知2/3 Dolci又推出咗幾款聖誕蛋糕嚟應節，有個裝，亦有件裝，更有唔少其他聖誕相關嘅產品。小弟工作地點跟中環店咁近，無理由錯過架！

一向以少甜主義專注製作意式雪糕、手工蛋糕及咖啡嘅2/3 Dolci，佢嘅意式雪糕出名好食，其實蛋糕都好有水準，之前就曾經試過佢嘅Millefogile（雜莓拿破崙蛋糕）、Daisy（伯爵茶慕絲蛋糕）、Passiflora（熱情果慕絲蛋糕）（詳細食評可瀏覽：http://garycwm.blogspot.hk/2014/08/23-dolcidolci.html），各款蛋糕真喺做得細膩高質素，今次再臨品嚐新款聖誕蛋糕，同朋友提早慶祝聖誕節。

聖誕有唔少朋友都喜歡開派對，加個聖誕蛋糕就更能增添氣氛，見2/3 Dolci嘅3款個裝聖誕蛋糕賣相非常吸引，包括：紅噹噹星形嘅荔枝玫瑰慕絲蛋榚「Christmas Amore」（$420 / LB、$620 / 2LB）、木頭外形嘅橙酒朱古力卷蛋「Yule Log」（$238）及嬌柔雪白嘅士多啤梨意大利有氣葡萄酒卷蛋「Rotolo di Fragole」（$238）。幾款蛋糕嘅味道配搭都相當特別有心思，單想像已有一股衝動想試。

Rotolo di Fragole (Strawberry Prosecco Roll) $60

荔枝玫瑰慕絲蛋榚及橙酒朱古力卷蛋只有個裝，唯獨士多啤梨意大利有氣葡萄酒卷蛋有件裝發售，咁……又豈能錯過。淡淡士多啤梨味嘅粉紅色蛋白海綿蛋糕，極之輕盈鬆軟，中間包住原粒新鮮士多啤梨，果肉清甜，不過，最驚喜喺加入咗意大利有氣葡萄酒所做嘅鮮忌廉，柔滑得嚟滲出朕朕葡萄酒芳香，好有創意。

而另外兩款聖誕件裝蛋糕一白一綠分別喺：雪花形嘅雜莓芝士蛋糕「Neve」及聖誕樹形嘅蘋果玉桂慕絲蛋糕「Abies」，外形絕對貼題。

Neve (Mixed Berries Cheesecake) $48
雖然明知喺用杯模倒出嚟，但潔白雪花嘅造型，冷艷而細緻，有啲唔捨得落刀嘅感覺。表層喺口感較輕柔嘅忌廉芝士，好似德國芝士餅一類咁柔滑，而內裡則喺相對較挺實嘅忌廉芝士，正正紐約芝士餅嗰種咁挺身濃郁，不過，因為中間加咗一層鮮雜莓醬，立時酸香嘅雜莓跟濃郁嘅芝士變得調和，唔會太過重膩。Neve，有外表，更有內涵！

Abies (Apple Cinnamon Mousse Cake) $48

翠綠嘅杉樹造型，再撒點糖霜，真喺夠晒意境。朱古力脆餅底加入果仁粒，已經有心思，而樹身喺蘋果慕絲，再加入混有玉桂炒過嘅蘋果粒，幼滑嘅慕絲散發淡淡嘅蘋果清甜，玉桂蘋果粒更喺香軟富玉桂香，不愧蘋果跟玉桂依一對「味力」組合。

焦糖鮮奶咖啡 $40（Regular）

小弟都喺鍾情甜品配咖啡，所以，又喺點一杯心愛嘅焦糖鮮奶咖啡。醇香柔滑嘅咖啡，蘊含輕盈嘅奶泡及沉香嘅焦糖，一啖餅，一啖咖啡，甜與香嘅交織，細味悠長。

除咗聖誕蛋糕，亦有唔少聖誕禮盒或聖誕禮物籃供選購，前者如朱古力片、曲奇、朱古力果仁、蝴蝶酥、手工芝士條……等等，由五、六十到二、三百都有；而後者一大個禮物籃包羅萬有，就將上述嘅聖誕禮盒，再加啲精選茶葉之類，作唔同組合配搭而成，售價當然不菲（$628-$1688），但送俾客人就夠大體嘛！所以，有興趣不妨攞本簡介睇睇，上官網查看同樣方便。其中順道都介紹吓幾款小巧嘅聖誕小禮盒，包括聖誕片裝朱古力、朱古力花生果仁及瑪德蓮蛋榚。