沙田店位處沙田中心，由新城市廣場橋駁橋接駁到過嚟，非常方便，而且人流唔少，比起深水埗店瑟縮晌小街內，周邊環境好唔同。之但喺，內裡格局又差不多，都喺又深又長嘅鋪位，但依邊個粉紅主色調更搶眼，加上樓底夠高，又光猛整潔，牆上又掛有好多店家嘅招牌甜品相，配合埋粉紅色小圓櫈、可活動白色方枱仔，好有活力嘅感覺！
英式果茶及朱古力噴泉跟深水埗店一樣，依然大大方方免費品嚐，分文不收。不過，要留意啊，朱古力噴泉原來有休息時間呢（6:00pm-7:00pm）！
餐牌跟上次嚟無乜大變，但事後跟店員傾開，遲啲會有改動，至少一啲夏日限定刨冰會叮走先啦！原來外賣有9折，住附近嘅人就可以唔使排隊，又可以慳番少少。
由於今次唔喺單純自己嚟試嘢，而喺帶朋友嚟食，故此，揀番兩款之前嘅心水推介俾朋友，包括焦糖布甸椰皇子及黑松露雪山，另外，有朋友唔食得太凍，所以，揀嚟熱食嘅花膠椰皇子。
焦糖布甸椰皇子 $42今次就唔喺由小弟評價個椰皇子喇，而且，朋友試過佢口述，我筆錄。朋友話超鍾意椰皇裡面啲椰青啫喱，清香爽甜，味道天然，椰青味道非常突出，好討人歡喜；而上面嘅焦糖布甸滑溜而富蛋香，帶焦糖味，混和椰奶，加倍好味。
黑松露雪山 $55
哈哈，佢哋見到個「雪山」即刻嘩嘩聲，忍唔住都要影番幾張相，更話個吐司做得咁搞鬼，所以，先要點嚟俾佢哋試吓。吐司並非台式做法，一件件，一層層，疊成金字塔形已經喺個亮點，賣相立體有心思，喺稍微嫌啲吉士漿唧得「肉酸」啲啫；不過，味道就無乜太大影響，吐司烘得鬆脆，我哋4個人啱啱好一人一條，中間嘅黑松露雪糕，上次我食嘅時間已好有驚喜感，朋友一試都喺同樣反應，話黑松露味突出到不得了，而個雪糕球濃郁香滑，正呀！
花膠椰皇子 $58
同樣以椰青做盛器，不過，裡面就唔喺啫喱嚟，既然喺熱食，做成燉蛋白就喺好唔錯，燉蛋白裝得滿滿，差唔多滿到瀉，而花膠份量又好足，配幾粒鬆化湘蓮，何止無欺場，直頭賣大包；燉蛋白好清好滑，少甜健康，加埋啲花膠，又補又滋味，相得益彰。
除咗個花膠口感差咗少少之外，招牌焦糖布甸椰皇子及黑松露雪山真喺無得彈，有心思，有創意，再食都無走樣，水準夠穩定，怪不得咁旺場，座無虛席啦。
個人評分
味道：8/10
環境：7/10
服務：8/10
抵食：8/10
平均每人消費：HK$39
味道：8/10
環境：7/10
服務：8/10
抵食：8/10
平均每人消費：HK$39
餐廳資料：
甜入心 Heart's Dessert
沙田橫壆街2-16號沙田中心3樓22A號舖
2243 4868
甜入心 Heart's Dessert
沙田橫壆街2-16號沙田中心3樓22A號舖
2243 4868
沒有留言:
發佈留言