散點餐牌分為餐湯、前菜、海鮮、主菜、意大利粉及伴菜，若散叫自不然無咁划算，就以主菜為例，定價由$138-$488，但大部份喺晌$200左右嘅價位；而甜品則列晌另外有一個餐牌之內。
店長推介凍海鮮拼盤，最近做特別推廣，仲附送兩杯餐酒或生啤，唔喜歡嘅又可改飲非酒精特飲。而海鮮拼盤有分大（$398）及細份（$238），同樣包括龍蝦、青口、蝦、翡翠螺及帶子，在乎份量唔同而已，前者適合3-4人，後者則可供2人享用。
凍海鮮拼盤 $398
以海鮮拼盤作為我哋嘅頭盤，加上以巨型玻璃盤盛載登場，確喺幾有氣派。以冰粒鎮住，保持海鮮鮮度，波士頓龍蝦實在好味，啖啖肉鮮味爽彈；凍蝦及翡翠螺亦不俗，蝦肉爽甜，翡翠螺有咬口，喺略嫌啲帶子肉奀啲。附上嘅紅酒醋汁及蕃茄醬，有提鮮作用，不妨將海鮮沾少少再入口，好味好多。
Pussy Foot $68、Shirley Temple $68
朋友所點兩杯非酒精特飲都話唔錯，前者以橙汁、菠蘿汁、石榴糖漿加少少奶溝成，後者則以青檸汁、石榴糖漿及七喜調製，更清爽涼快。況且，橙橙紅紅，好有視覺效果，就算幾個女孩子，只喺點杯特飲，邊飲邊談，都喺一件樂事。
較划算嘅選擇，首選固然喺晚餐，晚餐有分精選晚餐（Set Dinner，$198-$298 + 10%）及二人晚餐（Dinner for Two，$588 + 10%）。精選晚餐除包括沙律、餐湯，另主菜4揀1，還包餐飲1杯，更可另加$35額外加配是日精選甜品一客；至於二人晚餐則包括沙律或頭盤、餐湯、指定主菜兩客、精選甜品及餐飲。相對而言，精選晚餐彈性大少少。
煙三文魚凱撒沙律
個凱撒沙律做得不俗，羅馬生菜非常爽脆，醬汁溝得「勻巡」，配以煙肉粒、巴馬臣芝士薄片，令個沙律鹹鹹酸酸，煙三文魚都只喺錦上添花而已。
周打海鮮湯
味道OK嘅，湯內亦算有唔少海鮮粒，不過，問題一個湯上枱時只喺微微哋暖，其二個忌廉湯質感唔夠滑，入口仲有些少餬粒，相信打「麵撈」落湯時做得唔夠透。
香草包
配餐湯嘅麵包著實有點點失望，除咗款式單一，有感如某連鎖薄餅店嘅香蒜包層次，同埋，烘得比較乾身。唔喺話佢唔好食，只喺普通啲啫，跟個環境、價錢，唔太襯！
是晚精選晚餐主菜有：風乾巴馬火腿田螺煙肉天使麵（$198）、百里香忌廉茄子雞皇意大利飯（$208）、香煎比目魚拼大蝦配他力干香草忌廉汁（$268）及烤美國安格斯西冷配青胡椒汁（$298），而晚餐收費就喺以所揀嘅主菜嚟定價。
百里香忌廉茄子雞皇意大利飯 $208
意大利飯煮得飯粒濕潤、沾滿忌廉汁，不過，有欠咬口，缺少意大利飯應有嗰種米心煙韌嘅口感。雖然，雞肉挺嫩滑，茄子、白菌又能增加菜式嘅美味度，可是，整體依然覺得若有所失咁！
烤美國安格斯西冷配青胡椒汁 $298
以安格斯西冷入饌，配以青胡椒汁，相信有啲睇頭。西冷燒得金香，帶點焦香味，入口無庸置疑夠晒肉味，我哋選上五成熟，色澤亦都粉紅嬌嫩，不過，並無期望中咁嫩滑。青胡椒汁，香得嚟少辣，伴有薯條、蕃茄、西蘭花、椰菜花等，但薯菜略嫌大路欠個性。
法式焦糖燉蛋 + $35
餐飲要了一杯鮮奶咖啡，需額外多補$15，無細緻嘅拉花，無奶泡嘅順滑感，唯咖啡蠻香醇，但仍覺得要改善一下。雖然晚餐餐牌無寫，其實，最後都有一客的骰嘅意大利奶凍奉客，我哋卻改要精選甜品。焦糖燉蛋做得蛋香滑嫩兼備，而面層嘅焦糖脆糖燒得薄而脆，確有水準。
用餐環境及氣氛一流，但食物水準有改善空間，而且，菜式嘅部份細節位亦需要執一執，例如賣相、伴菜嘅配搭，否則，覺得嘥咗個場啫。
個人評分
味道：6/10
環境：9/10
服務：8/10
抵食：6/10
平均每人消費：HK$0（試食邀請）
味道：6/10
環境：9/10
服務：8/10
抵食：6/10
平均每人消費：HK$0（試食邀請）
餐廳資料：
GastroBox
尖沙咀金馬倫道33號 The Cameron 1樓101號舖
2369 8383
GastroBox
尖沙咀金馬倫道33號 The Cameron 1樓101號舖
2369 8383
沒有留言:
發佈留言