ICE POP 分子雪糕專門店：飯後嚐甜

上次嚟Ice Pop試過佢哋兩款蛋糕：香芒天使、檸檬蛋糕，味道不俗，用料都好足。今次趁中午同朋友晌附近飯聚完，算喺路經此地，走入嚟嚐嚐甜，談談天。

大概因為喺晏晝下午茶時段，眼見特別多客人入內幫襯，坐晌度慢慢食嘅又有，賣走邊行邊食嘅都有。一室黑與白，型格嘅裝修，加上分子雪糕，喺較易吸引年輕人，尤其製作緊雪糕時嘅煙霧瀰漫，啲人覺得特別有趣。

今期分子雪糕嘅4款口味包括：焦糖玉米味（$39）、英式蘋果金寶味（$42）、薑餅人味（$48）、海鹽豆腐味（$48），可謂各具特色。小弟算喺焦糖死粉，焦糖玉米味當然要試，聖誕限定嘅薑餅人亦應該走唔甩吧！

焦糖玉米味 $39

雪糕部份主要喺粟米味，再淋上焦糖漿，質感柔滑，味道尚算不俗，如再加重啲粟米味就更理想、更突出；而雪糕內混有粟米粒碎碎，雖然唔多，仍不時嚐到碎碎粒粒，幾有趣，況且，份量上亦算頗大杯呢！

薑餅人味 $48

一整塊薑餅插晌雪糕上，可愛絕對喺佢嘅最大賣點，雪糕有淡淡薑味滲出，甜中帶點辣，而雪糕內又混雜點點餅碎，唯一要講喺，價錢屬於最貴嘅款式，但份量卻又相對少，所以，幾啖就食鬼晒。

晌收銀機旁見佢哋做緊推廣，新推嘅VIP雪糕換領券，10張一本可以換咩味都得，$352就有一套，即喺平均每杯$35.2。算死草啲咁計，次次換到最貴嘅$48杯，足足平到75折。我覺得晌附近返工、返學嘅人，幾個夾份買就最划算。

下午時段總有種懶懶閒嘅感覺，但嚐甜過後，又能帶著一份滿足離開。

個人評分
味道：7/10
環境：8/10
服務：7/10
抵食：7/10
平均每人消費：HK$44

餐廳資料：
ICE POP 分子雪糕專門店 ICE POP Nitrogen Ice-cream
銅鑼灣邊寧頓街9-11號登龍閣地下B舖
3568 9948