今次嘅主題系列，一共出咗4款蛋糕或甜品，包括：「Mickey & Minnie心有所屬雜果蛋糕」、「Mickey & Minnie迷你情侶慕絲蛋糕套裝」、「Find A Mickey 尋找米奇牛油蛋糕」及「Mickey & Minnie心深相愛慕絲甜品杯」，各款產品都有唔同賣點。
Mickey & Minnie迷你情侶慕絲蛋糕套裝 $138套
因為喺兩個迷你慕絲蛋糕，最啱搵晚同老婆作為飯後甜品一齊食。鮮紅色嘅手挽盒，前前後後印有米奇、米妮，已經相當搶眼。打開蛋糕盒，一對黑色朱古力大耳朵，以兩個米奇、米妮3D標誌造型嘅慕絲蛋糕，入型入格，粉絲們見到一定覺得可愛非常。
兩個慕絲蛋糕，雖則叫做迷你，但份量一啲唔細，其實每個慕絲蛋糕一上一下，已經可以睇為由兩件凍餅組合而成，一位女生食一個，絕對頗為飽肚喔！
有粉紅蝴蝶頭飾、粉紅波點裙當然喺米妮啦，上層半球形喺柔滑嘅朱古力慕絲及朱古力海綿蛋糕底，再包一層薄薄濃郁嘅朱古力漿，更驚喜喺內裡仲加有卜卜脆嘅朱古力脆豆，口感變得多變唔單一。而下層以清海綿蛋糕底，配以士多啤梨果凍及士多啤梨慕絲，果香酸活，好怕太甜、太濃味嘅人，下層嘅酸香味正正可以中和上層嘅濃甜。
至於另一個米奇，較適合朱古力嘅死硬粉絲，因為上層跟米妮一樣，都喺濃郁香滑嘅朱古力慕絲蛋糕，而下層再下一城，以黑朱古力嚟做嘅朱古力慕絲蛋糕，更標榜採用法國頂級Cocao Barry朱古力，朱古力味更濃更甘苦。老婆對黑朱古力都幾偏愛，所以，「米奇」非常啱佢口味。
Find A Mickey尋找米奇牛油蛋糕 $118
由於依個「尋找米奇」喺個牛油蛋糕，相對都較為甜膩少少，所以，搵日人多同班朋友一齊先試依款蛋糕。蛋糕以全透明膠盒盛載，而且，因為喺牛油蛋糕，非忌廉蛋糕，所以亦無須急於入雪櫃。
其實個牛油蛋糕賣相一樣好可愛，糕面唧滿旋轉型牛油忌廉，又灑上好多七彩星星碎糖，再放埋兩個米奇、米妮馬卡龍，真喺有啲唔捨得食咗佢哋。
個牛油蛋糕最大亮點就喺「尋找米奇」，因為晌蛋糕內，只有切得啱位置，你就會搵到個粉紅色米奇，其實落刀位唔難搵，因為晌蛋糕周邊透出粉紅色嘅位置就喺嘞。
味道又如何？由於要藏個「米奇」落去，唔可以以海綿蛋糕嘅做法嚟做，耍改以牛油蛋糕嚟做，又因為要突出粉紅色嘅米奇，所以選用深色嘅朱古力味。蛋糕質感較乾身實淨，牛油味亦頗濃，朱古力味不俗，而蛋糕面嘅牛油忌廉（無忌廉成份，只喺有忌廉質感）幾軟滑，由於喺全牛油打成，都幾肥膩，所以你見佢都唔會做得太厚。其後我哋雪過夜再食，發覺仲好食，有啲似食緊班尼士。
Mickey & Minnie心有所屬雜果蛋糕 $178
雖然未有機會試，但相信一如美心西餅以往一貫忌廉蛋糕嘅水準。心型嘅雜果忌廉蛋糕，鋪滿多款新鮮生果，加上米奇、米妮心心相印朱古力牌，唔知會否勾番起你跟愛侶嘅浪漫戀愛回憶呢？
Mickey & Minnie心深相愛慕絲甜品杯 $28
精巧嘅慕絲甜品杯，依然繼續將米奇、米妮細水流長嘅愛情故事作為設計方向。最底層粉紅色嘅士多啤梨慕絲，再加一層意式奶凍及士多啤梨啫喱，放上新鮮嘅士多啤梨及米奇、米妮親吻嘅朱古力牌，絕對喺一款富心思、富層次嘅甜品杯。
整個系列供應到去4月23日，相信作為米奇、米妮迷，理應唔會錯過！就算你唔喺佢哋嘅粉絲，遇有家人、朋友喺嘅話，買個氹佢開心相信都好值得。再唔喺，就快白色情人節，買個「Mickey & Minnie迷你情侶慕絲蛋糕套裝」跟愛侶一齊分享，都好有心思吖！
個人評分
味道：7/10
環境：8/10
服務：8/10
抵食：8/10
平均每人消費：HK$0（試食邀請）
味道：7/10
環境：8/10
服務：8/10
抵食：8/10
平均每人消費：HK$0（試食邀請）
餐廳資料：
美心西餅 Maxim's Cake Shop
深水埗港鐵深水埗站SSP2號舖
2386 7121
美心西餅 Maxim's Cake Shop
深水埗港鐵深水埗站SSP2號舖
2386 7121
沒有留言:
發佈留言