寶利廚坊 Auntie Polly：於事無寶

今日有小組活動，所以，先返到嚟母會附屬嘅小學，都好耐無過返依花圃街、雀橋街依頭。活動前同啲組員一齊先食晏，平時都會揀去雀橋街嘅百味雅，典型茶記，食物質素穩定，但今次見人多，時間少少緊又唔想等，故此就去了後面花圃街嘅寶利廚坊。

對比起百味雅，雖然地方細細，但佢嘅環境就新淨啲，又企理啲。一室白襯深啡，加少少藤織櫈，咪以為好型格，到最後都喺打回茶記模樣。

午餐有好幾個餐牌，不過，分門類別似乎做得有啲「求其」，而且定價都相對貴，貴過百味雅，貼近附近一間酒吧餐廳April K。結果，我哋大部人都揀較為優惠少少嘅精選午餐，A-K共8款，賣$44-$48，跟一杯熱飲，如果唔要飯轉意粉仲要加$2。

鹹蛋蒸肉餅飯 $48

飯同餸嘅份量絕無偷雞，舊鹹蛋蒸肉餅真喺鎅得幾大件，朋友話啲肉餅都唔錯喎，肥豬肉唔多，打得都鬆化，唔會太硬實。

茄汁豬扒飯 $44

小弟要嘅茄汁豬扒飯，無疑又喺超大碟，如果一碟飯俾兩個小朋友食，絕對無問題吖。3大件有骨豬扒，雖然幾薄吓，亦算交足貨。豬扒炸得幾香口，由於薄身，入口幾軟腍。而茄汁個茄味幾重，不過，你唔會有酸香鮮活嘅感覺，因為就好似只有茄汁加茄膏嘅組合。

咖啡

一向晌茶記奶茶喺必然選擇，不過，對寶利廚坊嘅奶茶信心唔大，所以，叫咗杯咖啡，算喺不過不失嘅出品。

公司飯 $44

餸料就喺腸仔、餐肉、火腿、煎蛋各一，配咖喱汁，雖然無問朋友嘅味道，但應該都預期到，尤其見佢都只喺用普通嘅雞肉腸，餐肉同火腿亦應該唔會用太高級嘅貨。

除咗上述啲午餐，仲有一個由朝到晏都有供應嘅特餐，比午餐平少少啦，不過，都要$39，主要喺多士配蛋，加碗湯粉麵。

牛油厚多士配炒蛋

聽朋友講，件厚多士烘得幾脆，又搽滿牛油，反而個炒蛋麻麻哋，炒得過火少少。

沙嗲牛肉湯意粉

湯底比較淡味，而沙嗲牛肉少得可憐，味道中規中矩，唯一喺意粉好！

如果再去返嗰邊食飯，都喺搵番百味雅穩膽啲，不過，母會嘅重建都仲有兩、三年，暫且返過去嘅日子都喺少。

個人評分
味道：6/10
環境：6/10
服務：6/10
抵食：6/10
平均每人消費：HK$44

餐廳資料：
寶利廚坊Auntie Polly
九龍塘又一邨花圃街11-11C號又一樓地下3B號舖
2399 0963