星期六，由於5天工作，稍為瞓晏少少，故此早餐又相對食晏少少。同老婆要出尖沙咀搞銀行嘢，搞完都接近中午，其實大家都未喺好肚餓，不過，醒起「麵屋一平安」，講咗好耐要試要試，總要會一會。店子位處尖東幸福中心，個商場本身無乜人流，已經頗靜，仲要開晌地庫，兜完又兜先搵到，成個商場黑沉沉，得佢一個鋪位稱得上燈火通明。
無無聊上網睇吓「麵屋一平安」嘅往史，原來自1984開業，心算一下至今都成29年，依家啲老店一間一間咁執，而且近年拉麵嘅戰火燒得幾紅，周圍都喺，唔再局限三幾區，所以能夠晌拉麵市場屹立29年唔喺一件易件。佢前前後後仲開咗另外5家分店，依間元祖店保持開業原貌，所以感覺有啲老套，又無乜好日式嘅裝修，但都幾企理整潔。而近門口有個闊而矮身大書櫃，好易走漏眼，擺滿好多日本漫畫及雜誌，充滿日式小店風格。
打開餐牌第一頁，有多張拉麵大相，屬店中重點推介。雖然以豬骨湯配多種海鮮、豚肉、野菜嘅長崎拉麵喺店內招牌，紅足多年，不過，我哋就無打算點。因為見有個麵定食，賣$80已包咗一碗拉麵及一碗迷你飯，上文都講過我哋都唔喺好肚餓，但叫一碗拉麵兩份又好似有啲唔好意思咁，所以依個麵定食正合我哋心意。除咗拉麵，依度都仲有丼物、串燒、一品料理、揚物、沙律……等供應。
拉麵
麵定食嘅拉麵，有鹽湯、豉油湯、麵豉湯可揀（如果想試店中嘅豬骨湯，就要揀其實款式喇），老婆不嬲都喺味噌死硬粉絲，當然二話不說要麵豉湯。棕啡色嘅麵豉湯，據介紹喺以自家熬製嘅清湯撞入預先炒好嘅麵豉醬內，所以麵豉味份外濃郁，呷一口果然喺濃濃麵豉香，最後我哋都差唔多飲晒成碗湯。麵條方面，都有分種類喎，真喺唔講唔留意到，由於我哋點麵豉湯，故配上豉油麵，喺最傳統日式拉麵，麵條有少少曲線，口感較滑身爽口，配豉油或麵豉湯都夾嘅。此外，據店員介紹店中仲有熊本麵（形狀直身，質感彈牙，配豬骨湯最好）、長崎麵（形狀直身，相比粗身，富咬口感），以及專為撈麵打造嘅撈麵麵條（同樣直身，質感稍硬）。跟拉麵仲有兩大塊叉燒、栗米粒、筍乾及蔥花，叉燒屬偏瘦型，肥肉唔多，但咬落質感都鬆軟喎！
迷你飯
有迷你炒飯或迷你豬腩飯可供選擇，都唔知炒飯有啲乜，就索性揀豬腩飯。雖說迷你，其實都夠一位唔大食嘅女士享用。豬腩肉肥瘦相間分明，如果唔怕肥嘅，大啖咁咬會覺得肉質鹵得好鬆化，一咬即開，又非常入味。配有半隻流心蛋，不俗，珍珠米粒圓潤，黏糯有咬口。簡簡單單一碗豬腩飯，食起嚟，頗有老店嘅感覺！一碗麵豉拉麵散叫價都要賣$60，依家俾多$20就多碗迷你豬腩飯，非常划算呀。
「麵屋一平安」最初主要賣長崎拉麵、麵豉拉麵、廣東拉麵……等等，直至2004年先引入正宗豬骨湯底，同時推出熊本拉麵。其實老店一早在變，據知5家分店各有不同，唔單止賣麵，有啲供應埋刺身、佐酒小食，有啲就有串燒，好似最新（舊年）開業嘅將軍澳店，增設日式甜品，又於店門口加置日本小食、精品專櫃，務求俏俏中蛻變。祝願店家一路平安！
個人評分
味道：8/10
環境：7/10
服務：8/10
抵食：8/10
平均每人消費：HK$45
餐廳資料：
麵屋一平安 Noodle House Ippei-An
尖沙咀加連威老道92號幸福中心地庫B1號
2722 4826
沒有留言:
發佈留言