agnès b. Café LPG：甜品．也有妳的名字

食完「麵屋一平安」，反正下晝無乜嘢要搞，難得今日天氣又唔錯，所以晌尖東遊咗個圈，行行海濱，吹吹海風，之後心血來潮，再過嚟K11嘅agnes b. Café，舒舒服服嘆埋個下午茶先歸家，實行真真正正輕鬆渡週末。

agnes b. Café跟starbucks、pacific coffee嗰類感覺好唔同，佢環境營造一貫法式小咖啡室，小木椅、小圓枱、幾何圖案花地磚，俾啲人三幾個老友嘆吓茶、食件餅、傾吓偈；唔會好似後兩者咁，有啲大隻佬梳化，hea到可以晌度瞓吓，賣埋三文治、麵包，做埋正餐生意。

再者，睇見一列餅櫃有咁多款精緻小巧嘅凍餅，點杯熱飲，就知agnes b. Café確喺嘆下午茶嘅好地方。最得意喺每件蛋糕有佢自己嘅名，所指嘅「名」唔喺話依件叫芒果慕絲，嗰件叫黑朱古力軟心……，而真喺有個名字俾佢，例如：Florence、Jasmine、Carla、Danielle……仲要喺女生名字，也許女生特別愛甜，挺有心思別意！

在餅櫃前跟老婆研磨一番，實在太多款式，簡直真喺心猿意馬，唔知揀邊款好，結果老婆揀嘅喺Mélanie，因為佢鍾意松露朱古力，小弟則睇中Patricia，基於佢外形特別。飲品方面，下文自有分曉。

Mélanie（紅莓松露朱古力蛋糕）$32
撮自維基資料，Mélanie喺個女生名字，源自希臘文μελανί（melania），意思喺黑色、黑暗，所以依個名絕對襯晒件紅莓松露朱古力蛋糕。因為長條形嘅佢，一身由底而上深至淺不同嘅黑，由朱古力海綿蛋糕、松露朱古力、紅莓軟漿、唂咕粉嘅組合，慢慢品嚐，集軟、綿、柔嘅口感，味道以濃郁朱古力為主導，躲在唂咕粉底下嘅軟漿薄層滲出紅莓酸甜，令到甜膩嘅味道當中帶有微酸作平衡。雖然依個都喺做凍餅常見嘅處理手法，唔值得咩驚奇，但小弟仍然欣賞其手功細膩、味香濃郁，朱古力粉絲豈可錯過嘅甜點。

Patricia（啤梨慕絲蛋糕）$32
Patricia，另一個很有意思嘅女生名字，源自拉丁文patrician，即喺古羅馬嘅貴族咁解。球形嘅佢顯得比較特別，不過，如果棄用啡色朱古力粉，改用綠色朱古力粉噴做外層嘅絨面，變成一粒大寶玉，加上啤梨喺個蛋糕嘅主題，小弟就更加覺得貼近佢名字個意思。因為我見另一款蛋糕Jasmine（茉莉雲呢拿海綿蛋糕），都喺一身青綠外層絨面，所以改用綠色朱古力粉嚟做唔喺咩難事。講番味道，為方便讓店員提取，蛋糕底下墊有一塊脆米朱古力餅，略嫌有啲硬實，未達至鬆脆嘅效果；其實球形嘅蛋糕分開上下兩截，下層喺焦糖慕絲夾海綿蛋糕，並有一層薄薄白朱古力外殼，上層喺啤梨肉、啤梨慕絲夾海綿蛋糕。幻想著一清一甜應該唔錯，查實兩者慕絲都打得細滑柔軟，只喺啤梨味雖有，但未夠突出，有啲被焦糖味攝位成功嘅感覺，與其整兩截咁花功夫，不如全個就咁用晒啤梨肉、啤梨慕絲、海綿蛋糕做可能仲好。

馬可波羅花茶 $35
飲品方面分為3大類：咖啡、朱古力、茶品。老婆鍾意飲茶多過咖啡，8款茶品中，揀嚟Marco Polo馬可波羅花茶，屬於花果黑茶，出自法國品牌Mariage Frères，老實講，小弟對茶嘅認識好有限，再講就「棧」獻醜，有興趣想多了解此品牌，茶包個牌仔已印有公司網址。茶包用棉布織成，感覺已高檔咗好多，色澤唔喺好深，但清澈見底，純粹講個人感覺，茶味挺芳香，略略有點香料、鮮花氣味，含蓄不搶，飲起嚟頗舒服。

法式焦糖燉蛋風味鮮奶咖啡 $39
請留意，喺焦糖燉蛋「風味」，咪以為咖啡裡面有啲焦糖燉蛋咁「騎呢」先得，講白啲，其實佢只喺杯焦糖鮮奶咖啡咁啫。雖然杯面無拉花，又無畫公仔，只喺用啲焦糖漿寫咗個agnes b.個「b.」字，但至緊要杯鮮奶咖啡沖得好飲。奶泡跟咖啡比例恰好，幼滑香濃兼備，口感柔順輕盈，雖然小弟唔喺咖啡狂熱，飲咖啡都喺講感覺，但至少依杯啱晒我口味！

一杯咖啡，加一件餅，可以等於一個「嘆」字。人生裡，運算可以就喺咁簡單。

個人評分
味道：8/10
環境：8/10
服務：8/10
抵食：8/10
平均每人消費：HK$70

餐廳資料：
agnès b. Café LPG
尖沙咀河內道18號K11購物藝術館G28舖
3122 4184