翠園 Jade Garden Chinese Restaurant：重聚定必有恩

上年有班國內山區嘅朋友嚟香港玩，其中一日喺自由活動，所以就請咗佢哋嚟翠園食飯，仲寫咗篇食評「翠園．隨緣」，以前都跟老婆嗰邊親友食過幾次翠園，一向對翠園都印象唔錯。今次「重遊舊地」，事緣偶然間在面書中聯絡番一位十多年前認識嘅團契導師，講開約出嚟食餐飯，又有其他團友仔和應，加上人數唔太多，所以飯局好快搞得成，既然又喺咁隨緣，所以地點咪就喺揀翠園囉。

席間大家咁多年無見，所以話題多喺圍繞彼此嘅變化，家庭嘅轉變，生活嘅轉變，工作嘅轉變，信仰嘅轉變……。但回望過去，講番初相識之時，又好似唔喺好耐嘅事咁！哈哈，好似啲老人痴呆咁，近嘅嘢就「蒙查查」（尤其公司嘢，更加唔想記住晒），遠嘅嘢就記得清清楚楚。

泡菜 $12碟
有毛豆、烤麩、烚花生，毛豆唔知喺咪以鹽水泡浸過，帶少少鹹味；深啡色如海綿嘅烤麩，入味耐咬；烚花生軟軟腍腍，人未齊，食吓傾吓，好快就清咗一小碟。

秋栗炆排骨 $88
小瓦煲滿滿載住炆排骨，配料仲有冬菇及栗子，冬菇非常厚肉，而栗子亦十分粉甜，排骨彷彿有啲變成「大茄」之角。雖然變咗配角，但佢都算入圍到候選最佳男配角，因為排骨炆得夠味又鬆化，又唔會有太多餘嘅醬汁！

啫啫生斑腩煲 $118
跟手上枱喺個斑腩煲，霎吓眼以為嚟錯，佢跟個排骨煲都有七分似樣。以小瓦煲，好處就喺耐熱，保溫好，所以食到中段啲斑腩仲喺熹辣辣。以豆瓣醬、薑、乾蔥生啫斑腩，絕對夠晒香嘖嘖，魚肉挺實唔鬆散，惹味熱辣之選。

蟹肉滑豆腐 $78
其實，豆腐類都幾多款揀，例如：紅燒滑豆腐、百花蒸釀豆腐、金瑤琵琶豆腐。上兩個菜屬油膩餸菜，都想搵啲清淡菜式嚟平衡吓，加上上次嚟都有點依個菜，印象中覺得唔錯，所以就翻點。超嫩滑豆腐，配以蟹肉、磨菇、小棠菜葉所打嘅茨汁，細滑鮮甜。今次似乎蟹肉比上次多，不過，賣相始終跟大會相片有好大段距離。

踏雪尋紅梅 $98
個名就改得好有意境，但喺賣相就稍為肉酸啲，我覺得以翠園水準可以再做靚啲嘅。何謂踏雪，原來喺蒸鮮奶蛋白，幾香幾滑，內裡仲加入咗帶子粒、魚肉、蝦仁、菜梗片，多添一份海鮮味，蒸蛋白立時都變得高檔咗；而紅梅就噝粒粒蟹籽，可惜一來唔夠多，突出唔到「尋紅梅」嘅效果，二來偏埋晒一邊，下得感覺有點「求其」，所以咪就喺話佢個賣相肉酸囉！

欖菜肉碎四季豆 $68
原本喺點個小杬煎魚餅，未試過，覺得應該幾好，不過侍應後來話賣晒，改叫欖菜肉碎四季豆，粵菜常見嘅「家常菜」，另一惹味送飯之寶。欖菜落得剛好，鹹香得嚟無過鹹，四季豆炒得香又爽身，少鹽少油都喺依家煮餸趨勢。

一品八珍扒大鴨 $98（半隻）$188（全隻）
睇相真喺好吸引，所以就點半隻嚟試一試。半隻紅燒鴨墊底，鴨肉已經煮到好腍好鬆化，亦唔算燥；上面就淋上炒八珍：大蝦仁、帶子、海參、花膠、魷魚、叉燒、冬菇、小棠菜，每樣材料有少少，其實味道唔算有咩特別，勝在夠大堆頭。

總括而言，食物味道唔錯，中上水準，不過以美心中菜水平，賣相方面可以做得更好。茶芥 $11位，白飯 $12碗，8個人總共食咗唔夠$800，當然因為我哋當中女士多，就算男嘅又唔喺好擦得之人。計及埋環境、服務，依餐又真喺幾抵。講真，大家嘅重點放晌彼此傾偈多過餐飯食咗乜，喺得我一個又要傾偈，又掛住食嘅啫。

朋友間嘅重聚，有人睇為緣份，其實亦喺一份恩典。最後嚟張大合照，結束是晚飯聚！

個人評分
味道：7/10
環境：8/10
服務：8/10
抵食：8/10
平均每人消費：HK$100

餐廳資料：
翠園 Jade Garden Chinese Restaurant
旺角太子道西193號新世紀廣場6樓603號舖
2628 9668