有事要落一落長沙灣搵親友交收，其實順寧道依頭都幾熟，事關親友就住晌附近，正值食飯時間，都要搵個地方醫肚，所以晌就近嘅「新口味」食個晏。新口味個名有點老土，之不過估唔到佢竟然有個英文鋪號：Candy Café。
單睇名，無論中文嘅新口味餐廳，抑或英文名嘅Candy Café，應該俾你有個印象喺間小咖啡室之類，但完全錯晒，絕對喺茶餐廳格局，牆上又貼滿碟頭飯名稱，是日仲要撞正跑馬日，頭尾兩部電視賽馬直播，完全喺麻甩天地。
除早餐、下午茶、公仔麵餐、車仔麵之外，午市或晚市主要都喺賣碟頭飯，唔見有小炒之類供應。大部份套餐價錢都非常之平，好似小弟所食嘅「超優惠午餐」（$28），有6款選擇，已經包餐湯及熱飲（凍飲+$2）；「特色炒飯」、「精美焗飯餐」都喺$30就已經有交易，就算店中最貴嘅「歐陸式粉麵」，都喺賣$35-$42，同樣奉送餐湯熱飲。價位之平，可謂抵過附近嘅連鎖快餐店，相信會喺附近街坊嘅飯堂。
超優惠午餐、特式炒粉麵餐牌
特色炒飯、精美焗飯餐餐牌
其他餐牌，同樣抵食，只喺歐陸式粉麵喺貴啲。
是日餐湯
唔好太期望有紅湯、白湯揀，只得中式例湯獨沽一味：黃豆煲豬骨。湯料唔多，味道亦唔濃，不求滋補濃郁，只求讓街坊有啲湯水到肚，喺好例行公事嘅例湯。
鮮茄脆雞球飯
脆雞球即喺酥炸雞球，就算新鮮整，淋咗蕃茄汁多少都影響個酥炸雞球嘅香脆度，個汁底大可淋晌雞球周邊啲飯面度，相信效果更好。雞球用上雞脾肉，始終成本所限，又要製作夠快，所以雞肉唔嚡都收貨，但脆漿就肯定太厚身喇，而汁底色澤偏橙算不得好自然，做法較港式。為咗幫襯嘅工人食完有氣有力，又或讓街坊慳番啲叫一碟都夠兩份食，所以白飯超多。
奶茶
個人覺得不俗，幾香茶味，略嫌未夠滑。但奶茶依家嘢，總喺覺得茶記點都好過快餐店。
其實想俾個「笑」佢，今時今日，以$28食一個午市正餐，有湯、有飯、有嘢飲，我唔會期望好食都震，但能充飢飽肚，又味道唔錯添。但喺列為開飯之選，諗諗吓又唔可以純因一個平字，味道方面都要考慮吓，總之晌OK之上啦！
個人評分
味道：6/10
環境：6/10
服務：6/10
抵食：9/10
平均每人消費：HK$28
餐廳資料：
新口味餐廳 Candy Cafe
長沙灣順寧道439號順寧居地下
2387 8366
沒有留言:
發佈留言