山區裡的走走趯趯: 米線樂•麻辣豬骨濃湯 Tasty Rice Noodles：惹味在「線」

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2021年7月13日星期二

米線樂•麻辣豬骨濃湯 Tasty Rice Noodles：惹味在「線」

因為家住美孚，所以，晌荔枝角、長沙灣一帶嘅足跡都比較多，加上好幾位親友、朋友都喺住晌順寧道一帶，故此，不時約晌呢頭短聚。今晚就簡單嚟到「米線樂」食餐米線，粉麵店中，米線鋪都幾深受港人鍾意，因為平靚正嘛。

藍綠色嘅鋪面已裝修得比較新派，入到去裝修雖然簡約，水泥地、水泥襯白磚牆身，但牆上有唔少精心用語，都幾得意，好年青人嘅感覺。最緊要都喺地方乾淨企理，當然，啲膠板再大塊啲感覺就更好啦。

米線受歡迎皆因抵食，基本嘅大碗米線底都喺賣$28-$32，當中已包咗唔少基本配料，而餸料亦非常多選擇，分4個價位：$7、$9、$12、$15，叫多叫少，豐儉由人。此外，仲有啲指定款式嘅米線、小食、炸物、涼拌……等等，仲有汽水、啡茶、特飲添。

枱角有個二維碼，識嘅可以自行落單，唔識或唔熟嘅，搵店員代勞佢哋都好樂意。

筷子已放晌枱上，而餐廳中間位有一個自助區，放咗啲紙杯、碗仔、匙羹、餐紙、牙簽、熱水……等等，自由取用。

滷水豬耳 $22

見佢有唔少特別小食，就揀少少嚟試吓，豬耳唔喺人人都鍾意，難得朋友都啱，就點一客滷水口味（可揀麻辣）。咪睇佢只喺一小兜，好似食極都有，滷得入味，口感爽脆得嚟又有啲嚼頭。

酥炸墨魚膠豆卜 $36
另一款好奇嘅小食就喺呢一款墨魚滑+豆卜嘅組合，將墨魚滑釀晌豆卜中間酥炸。豆卜炸得香口唔油膩，中間嘅墨魚膠好爽口，但稍嫌淡味咗少少，灑啲淮鹽，相信更好味。

豬骨濃湯米線 $28（+酸菜 $7、潮汕芫荽牛丸 $12）

如果有留意門面，就見到餐廳主打豬骨湯，而米線已配有芽菜、腐皮，加兩款餸就變成大大碗嘅米線。朋友話個湯底唔錯，香濃卻唔濁，平常食米線都喺雞湯底，配豬骨湯佢話都喺第一次；芫荽牛丸好彈牙，有微微芫荽味，如果再落芫荽重啲就更好，反正叫得呢款配菜都喺為陣芫荽味，正如食羊嘅人都喺想有嗰陣羶香味。

秘製涼拌米線 $32（+魚腐 $9、孜然免治雞肉棒 $12）
天口熱，所以，小弟就揀咗個涼拌米線，睇餐牌就見呢一款米線基本包咗芫荽、肉碎、炸黃豆、青瓜絲，拌以麻醬，不過，成品就唔喺麻醬，而喺秘製醬油，另外多咗好多酸菜，就咁撈勻嚟食，已經好惹味，加上份量足，好飽肚。雖然小弟揀咗走辣，但啲肉碎帶微辣，兼有陣陣花椒味，唔太嗆喉，OK嘅！總之，食落涼涼哋，又有少少刺激感。