知粥嘗樂 Congee Wonderland：心滿意「粥」

完全玩晒食字嘅店名，喺幾易入腦，而位置正正晌炮台山站斜對面，幾分鐘步程，如果落雨嘅話，又可以駁天橋過去，非常方便。帶老友嚟食粥，老友無微言，皆因「知粥嘗樂」唔喺單賣普通嘅粥，梗喺有啲特別先過嚟試吓啦。

近門口位就喺廚房，隔住玻璃，就可以睇到師傅整腸粉，炸油器。

行入啲就喺餐廳堂食區，明門面睇唔出，餐廳嘅環境都幾大，兩側喺卡位，中間喺2、4人組合枱。唔好以為無乜人，個個都揀晒坐兩側嘅卡位。我哋亦專登搵個角落卡位，感覺靜侷少少好傾偈。

餐廳環境好企理，地方整潔，就連枱上嘅醬油架都擺放整齊，枱面望落去真喺一塵不染。而且，甜豉油、甜醬、麻醬、辣醬……等等一應俱全。

而基本餐具，如筷子、匙羹、叉……等等，都放晌枱邊嘅拉櫃桶裡。

翻一轉餐廳，就會睇到有好多選擇，唔喺單單食粥咁簡單。傳統嘅又有，富特色嘅又有，仲有火山石扒餐、馬來咖喱餐、小食……等等。

牛脷腸粉 $17

「炸兩」喺乜唔使我多講，但「牛脷腸粉」又喺乜呢？其實就喺「炸兩」嘅牛脷酥版，小弟本身都幾鍾意食牛脷酥，所以，就更加想試。外觀當然跟「炸兩」無分別，食落嘅口感亦差唔多，但牛脷酥就帶甜品，質感較油炸鬼密心啲、口感實在啲，效果又幾唔錯。

鮮蝦腸粉 $28

老友傳統少少，話點都食番碟鮮蝦腸，腸粉皮拉得夠薄，透出蝦肉嘅鮮橙色，而且，蝦肉亦睇到色澤夠鮮，無暗啞。輕輕沾點甜豉油，已非常好食，腸粉皮好滑溜，有米香，加上啲蝦真喺爽口彈牙，味道鮮甜，都無咩挑剔位咯。

牛腩腸粉煲 $43

一不離二，二不離三，再嗌多一款腸粉類食物，見到餐牌中有個腸粉煲系列，感覺都幾得意，就點咗其中一款嚟試試。打開煲蓋，真喺香氣四溢，夠熱辣辣，夠晒熱辣辣煲內有好多牛腩，本身已炆得好鬆化；腸粉唔會炒到碎濕濕，仲嗦滿腩汁，都真喺幾難唔好食，再者，啲腸粉跟上面兩碟捲得實淨啲，唔會散開，又更有咬口。

蝦蟹粥 $108

砂鍋海鮮粥其實喺我哋嘅目標，最好喺有大細嘅份量，方便客人按人數去點，原本打算試鮑魚沙田雞粥，可惜已經賣晒，唔緊要，蝦蟹粥我哋都啱食。

即叫即煮，都真喺要啲耐心等吓，一整窩砂鍋粥，唔講得笑，非常大鍋，事前已問過店員嘅份量，最後，足足裝咗4碗有多，夠2-3人食。個粥底好綿，而味道非常之鮮，堅喺食到陣陣海鮮嘅甜味。

而蟹用咗一整隻，蝦就無刻意數，但食極都有咁款。隻花蟹，一食就食得出喺新鮮貨，陣蟹鮮味好強，鮮蝦亦無欺場，同樣極富鮮甜味，兩款海鮮好掂，所以，唔怪之得個粥都咁鮮香，個海鮮粥性價比極高。

今餐晚飯，無論啲腸粉，抑或個砂鍋粥，既有亮點，又有質素，都讓大家都食得好稱心，真正心滿意足。

個人評分
味道：9/10
環境：7/10
服務：8/10
抵食：9/10
平均每人消費：HK$65

餐廳資料：
知粥嘗樂 Congee Wonderland
北角炮台山英皇道175號地下
2802 6128