山區裡的走走趯趯: 十二鍋 12 Pots：「鍋」心之選

2021年7月20日星期二

十二鍋 12 Pots：「鍋」心之選

原來台式一人一鍋已經好耐無食過，再睇番小弟自己嘅食評，對上一次已經喺兩年幾前嘅事，然而，對呢一類一人火鍋嘅形式感覺唔錯。今晚約咗其中一個「死佬」飯聚，選址就番佢，所以，揀咗嚟到佐敦嘅「十二鍋」。貪其位置又近港鐵佐敦站，但小弟又可以揀搭屯馬線返美孚，夠晒方便。

餐廳內裡嘅環境其實晌鋪面一眼望得晒，裝修簡約明淨，部份牆身嘅花磚幾靚，但最緊要喺夠乾淨企理。因為限聚條件下，大致上以4人位為主，我哋揀咗張較入角落位置嘅4人枱，靜靜侷更方便傾偈。

既然喺主打台式嘅一人鍋，咁就梗喺先介紹火鍋選擇啦，共12款湯鍋套餐，有晒圖做參考，而且，更列清楚鍋內有咩配料，其中第12鍋喺期間限定，而呢期就喺濃郁荽茜鍋。每一款套餐包括埋白飯或韓國粉絲（+$7可升級為滷肉飯或烏冬）、凍低糖紅茶或綠茶（同樣，可+$7轉為餐牌中$28或以下飲品）。

除火鍋之外，仲有多款特色小食、加點食材及麵飯主食，所以，如果喺一家人或兩夫婦等組合，大可唔需要一人一鍋，而改加點其他配料及主食。然而，目測所見，幫襯嘅都喺以年輕人居多，因為百零蚊就可以食到飽一飽。

既然喺台式餐廳，台式飲品自然成為另一亮點。飲品餐牌中，有近成30款飲品，由經典純茶、手調特飲、經典奶茶、果汁梳打、特色奶雪……等等。不愁無選擇，梗有一款啱你心水。

落好單，店員就會送上4款調味料俾客人佐食，包括生蒜蓉、辣椒油、豆瓣醬及沙茶牆，當然，豉油早已晌枱上備用。不過，小弟嘅湯鍋自覺夠晒味，亦唔多需要再額外提味。

夜市雞皮捲 $36

本來我哋打算叫兩個鍋就算，不過，見呢一款小食大家都未食過，平常去啲台式餐廳都好似無，當然點一客試試。外層嘅雞皮煎到好脆口，又帶少少油香，卻唔覺肥膩，再咬落去，裡面嘅雞肉好嫩滑，真喺有啲驚喜。

芝士竹輪壽喜燒 $115

友人點咗壽喜燒湯底，所以，味道帶少少甜味，但感覺又幾清，唔會影響食材嘅原味。晌餐牌已標明有牛肉、蟹棒、芝士竹輪、南瓜、粟米、雞蛋、娃娃菜、炸枝竹、鳴門卷、香菇、金菇、蛋餃、芝士魚豆腐、蜂巢豆腐等十多種配料，雖然無真正數過，但目測都差唔多，一大鍋樣樣有啲，完全滿足到港人嘅樣樣都想試嘅心態，再加埋啲韓式粉絲，真喺一鍋「豐」，加上食材用料不賴，份量又十足，老友算喺大食之人，都話食到好飽、好滿足。

黑糖奶茶 +$7

指定嘅兩款飲品佢都麻麻哋，所以，加錢轉飲黑糖奶茶，佢話茶味唔錯，雖然唔似港茶奶茶咁濃郁，但都頗芳香，加上黑糖嘅香味，整體嘅感覺幾好。

蟲草花藥膳羊鍋 $115
有羊肉，就梗喺揀呢個蟲草花藥膳羊鍋，加上喺蟲草花同藥膳，心理上都養生啲嘛，哈哈。同樣，餐牌都列明晒有咩配料，包括羊肉片、蟲草花、鮮淮山、濃汁豬肉丸、爆汁牛肉丸、冬瓜、娃娃菜、炸枝竹、鳴門卷、香菇、金菇、蛋餃、芝士魚豆腐、蜂巢豆腐，一大鍋，真喺睇見都開心。個藥膳味唔會好似肉骨茶嗰類咁重，入口醇香；配料咁多，就唔逐個講喇，但基本上都唔喺平貨料，羊肉就OK啦，可能放得耐咗，開始有少少韌，但啲豬肉丸、牛肉丸、芝士魚豆腐真喺好好食。