山區裡的走走趯趯: 顏府御膳 Ngan's Chinese Cuisine：高「顏」值海鮮菜

2020年11月15日星期日

顏府御膳 Ngan's Chinese Cuisine：高「顏」值海鮮菜

上次趁郊遊，入到去石門一帶食咗一餐高水準嘅中菜，今回同郊遊無關，但同樣喺一餐高水準嘅中菜。銅鑼灣食廈Cubus，進駐得入去嘅都喺一啲中高檔餐廳，以前就光顧過其中嘅「Chez Moi」。最近，就加入新一員，喺賣精緻粵菜嘅「顏府御膳」，到訪當日都仲喺試期中。

餐廳裝修都喺走中國風，但又唔會大紅大紫咁俗氣，反而透過射燈燈效，有種高雅嘅親和感。再者，樓底比一般平常嘅食廈餐廳高，加上中間一排圓枱刻意唔用，增加咗空間感，亦對時下嘅防疫有好處。

最入面，仲有一個廂房，因為未有客嚟，店員都唔介意小弟入去影低幾張相。廂房內只容納一張8人圓枱，而裝修都幾骨子。

除環境，枱布、餐具、杯碟都好精緻。順帶一提，茗茶每位$20，本來想點鐵觀音，但聽到有菊花，就轉而選佢，茶味真喺好清香。

琥珀合桃 $20

未用餐前，先來一小碟餐前小食「琥珀合桃」，店員介紹時講明喺自家製，琥珀色嘅合桃沾滿白芝麻，外表悅目，咬落十分香脆及甜蜜。另外，XO醬亦喺自家製，啲瑤柱絲大大絲，香辣而不嗆喉。

菜譜真喺有啲厚，影起嚟可能唔喺咁清楚，請見諒。大致上，類別分為巧手小食、湯羹、山珍海味、魚翅、海鮮、肉類、家禽、時蔬、廚師推介、飯麵及甜點。如果唔想煩，仲有個「顏府嚐味晚餐菜譜」，六道菜定價$638 / 位。

釀焗鮮蟹蓋 $148

先登場嘅焗蟹蓋其實喺餐牌中嘅小食嚟，不過，就喺一客高級嘅小食。蟹蓋唔使多介紹大家都知喺咩，篤開一睇，果然真材實料無欺場，啖啖都喺絲絲蟹肉，入口勁有蟹鮮味，除咗少少蘑菇碎碎，最得意混入啲蘿蔔絲，提升一吓口感度，面頭嘅芝士忌廉汁亦校得啱啱好。

手工蟹肉石榴翅 $228

曾經晌「潮庭」食過一道石榴雞，印象甚深，因為好功夫菜，不過，已經喺多年前嘅事。今晚晌「顏府」再會，但升級咗加入蟹肉、魚翅嘅高級板。同樣做得精緻，加一大抹蟹黃做點綴，賣相就更搶眼高貴，篤開蛋白皮，睇到內裡釀有好多蟹肉及魚翅，入口鮮甜無比，再夾雜蟹黃一齊食，真喺無得輸，以佐以鹹香濃郁嘅高湯，更喺滋味無窮。

六頭大虎蝦 $168

食鮑魚就會分幾頭幾頭，食虎蝦食到分幾頭就真喺第一次，講真，上到菜就知「六頭」真喺好大隻。呢道菜可揀頭抽煎焗或雞油花雕蒸，當然後者較為特別啲啦。隻蝦唔止大隻，蝦肉仲好爽口彈牙，個雞油花雕汁好香，襯出蝦鮮味，而當中嘅酒味香得嚟又唔嗆喉，恰到好處。此外，唔好錯過蝦頭嘅蝦膏喔，再者，賣相又再為道菜加多點評分。