雖然餐廳所處嘅商廈相對比較隔涉，但估唔到都有咁多人等位，的確，晌密集嘅市區中搵個舒服嘅地方唔容易，而呢度地方大，空間感強，兩面落地大玻璃窗，加上放置咗唔少植物，以及一室木系餐枱椅，裝修簡約，卻予人感覺開揚闊落，非常舒服，所以，嚟到一定要預多啲時間，慢活享受吓。
除咗空間十足之外，餐廳環境亦有唔少值得留意嘅地方，如長長嘅咖啡製作枱，睇到咖啡師沖泡每一杯咖啡。
而入門口位置，吸引眼球嘅喺炒豆機，大大座放晌玻璃房內，可惜喺睇唔到其操作，唔知咩時間會開動部機，真喺想見識吓，未親身見過嘛。
此外，上文都提過有自家烘焙，麵包產品唔喺來貨，所以，近門口櫃枱面亦擺放咗店家嘅出品，堂食又得，睇啱買返屋企慢慢享用又得。
當然，唔少得其他咖啡嘅相關產品作零售啦。
講到食物方面，唔喺得輕食，亦有唔少飽肚嘢嘅，但款式就唔會太多。全日早餐啦、三文治啦、意大利粉啦、沙律及分享小食啦。
而飲品，尤其咖啡，更喺店家嘅亮點，此外，仲有精品茶、頗特別嘅燕麥奶昔，以及一啲非咖啡類及少少酒精飲品。
作為下午茶，或甜點，包括有一系列烘焙產品，如麵包、司康餅、蛋糕、多款窩夫……等等，但其中一系列名為Home Cake Plate就暫時未有供應，問過店員，大概喺啲甜點組合。堂食用餐需加一，但講到明喺無限時，可以慢慢坐。
抹茶戚風蛋糕 $40 抹茶戚風蛋糕都喺大個裝分割出嚟，再配上淡忌廉，賣相就欠奉喇，不過，戚風蛋糕都做得相當對辦，因為撳落去好鬆軟，而且，甚有回彈力，入口又唔會得陣風，抹茶嘅香味都幾突出；而淡忌廉亦加入抹茶粉去做，提昇抹茶嘅「味」力，打得亦非常細滑輕盈。
焦糖蘋果．伯爵茶．檸檬窩夫 $128 單睇名稱，你喺唔會知道實際喺點，究竟件窩夫喺焦糖蘋果味？伯爵茶味？定檸檬味？其實，窩夫可以講喺原味，不過，焗得深色少少，有蛋香，口感超鬆脆；伴有焦糖蘋果醬、伯爵茶味淡忌廉及檸檬雪糕，有別一般經常見到台式嘅窩夫堆砌好多生果，雪糕就講到明用Movenpick品牌，整體而言，其實都幾唔錯。
純粹拿鐵鮮奶咖啡 $34 襯甜點，都喺飲番小弟一貫心水及熟悉嘅鮮奶咖啡，飲品我就覺得佢哋標價好進取，但咖啡嘅定價又OK喎。我哋研究咗個拉花一陣，喺咪狗狗嚟呢？呷一啖先，口感均勻細膩，絕對喺因為沖調嘅手勢恰到好處，奶泡撞落濃縮咖啡度沖出嚟嘅口感平衡，更帶出咖啡嘅醇香。
手沖咖啡 $78 友人對咖啡嘅要求比我高，所以，佢就揀手沖咖啡，餐牌就寫住$78起，因為每日都唔同，故此，有另一小張手沖咖啡名單，是日就有8款，定價$78-$98，睇落都頗特別，但製作時間都好似好長，定有好多人都嗌手沖咖啡，結果等咗好耐先有。
友人揀咗較平嘅一款「巴西」，佢嘅反應喺，咖啡本身嘅香氣好自然，無苦澀感，醇香而順口，確喺飲到咖啡嘅原味，當中有新鮮咖啡豆所散發出嘅層次，聽起嚟有點深，果然境界高呀！
「樂感」嘅環境絕對喺餐廳嘅賣點之一，其次，如大型咖啡店般無限時嘅模式，亦喺吸引唔少人嘅因素，可能基於呢一點，食物嘅定價就變得進取。下午茶後，仲可以加插點餘慶，就喺行落去觀塘海濱公園，睇睇日落美景。
個人評分
味道：8/10
環境：9/10
服務：7/10
抵食：7/10
平均每人消費：HK$154
味道：8/10
環境：9/10
服務：7/10
抵食：7/10
平均每人消費：HK$154
餐廳資料：
樂感 Lagom Kaffe
牛頭角觀塘道348號國際貿易中心1樓101號舖
2368 5228
樂感 Lagom Kaffe
牛頭角觀塘道348號國際貿易中心1樓101號舖
2368 5228
沒有留言:
發佈留言