2020年9月13日星期日

皇玥餅藝 Imperial Patisserie:匠人手藝

近幾年,傳統嘅蓮蓉月餅越嚟越少食,唔喺唔鍾意食,不過,一來自己好少買,二來親友送贈嘅多數都喺啲奶皇月。如要數到奶皇月,打着奶皇月餅始創人葉永華大師傅監製嘅「皇玥」,點都睇高一線嘅。
「皇玥」真喺幾專心發展中式餅藝,除咗葉師傅,早兩年仲加埋擁有米芝蓮二星嘅黎永冠大師傅。對於兩位師傅嘅背景就唔再多描述,反正,月餅禮盒內都有佢哋嘅介紹。
bowl低糖迷你奶皇月餅 $228
怕甜又想食奶皇月餅嘅人就啱喇,店員話採用天然麥芽糖醇,每件月餅嘅糖份低至2%以內。其實個包裝都好靚、好典雅,外層嘅包裝卡紙,簡潔嘅線條勾畫出荷塘,予人感覺脫俗恬靜。內盒喺以金銅色為主調,透過紙料巧妙精製而做出獨特皮革理紋,非常有品味嘅設計,送禮絕對夠晒體面。
一盒共有4個月餅,獨立包裝已然喺基本,盒內放有簡介單張,更標明喺100%香港製造。仲有,備註大師嘅溫馨提示,最佳食法,就喺預熱焗爐150°C,加熱2分鐘就最好。無焗爐都無問題,以平底鑊預熱1分鐘,再加熱2分鐘亦得。 
切開睇睇,奶皇餡做得好綿密,入口質感軟滑細緻,既有蛋香,又不失牛油香氣,外皮薄得嚟啱啱好,少甜讓人覺得更安心。
bowl經典流心雙輝月餅 $338
之前都試過呢一款月餅,因為好食,所以,再「安哥」。不過,包裝好似唔同咗,外層卡紙以紅色為主調,配以仙鶴紙雕,有份祥和感。而內盒採用湖水綠作主色,同樣做出獨特皮革理紋,揉合現代設計,甚具秀氣。
一盒共有6個,採上下兩層設計,分別喺流心芝麻月餅及流心奶皇月餅,每個包裝袋底下都印咗口味名稱及食用期限,絕對唔會搞錯。
講得喺流心就唔喺流料,一切開件「流心芝麻月餅」,中間嘅芝麻流心餡湧流而出,芝麻味極之香濃,幼滑如芝麻糊咁,而外層牛油皮既薄且酥香,烘一烘過之後,餅底有烤脆咗嘅感覺,實在令人回味。 
「流心奶皇月餅」亦中出色,中間嘅流心餡口感軟滑,入口富奶香,又帶點鹹蛋黃嘅香氣,而餅身嘅奶皇質感綿密,令整體食味豐富咗,且甜而不膩。 
除咗以上同大家分享嘅兩款之外,仲有好多款式,如陳皮紅豆沙月、流心貓山王榴槤月餅、傳統啲嘅雙黃金黃蓮蓉月餅、低糖迷你白蓮蓉月餅……等等,加上包裝匠心獨運,甚具氣質,確喺表達心意嘅送禮佳品。

個人評分
味道:8 /10
環境:7 /10
服務:8 /10
抵食:7 /10
平均每人消費:HK$0(朋友送贈)

餐廳資料:
皇玥餅藝 Imperial Patisserie
中環擺花街26號地舖
2217 3638

沒有留言:

發佈留言