平記咖啡冰室：西多不似如期

嚟紅磡，最常嘅就喺有白事要出席，今次喺老友嘅爸爸過身，做兄弟嘅梗喺要幫手。小弟獲分配坐門口接待處，由於老友家人決定以傳統嘅道教儀式進行，所以，要5:00pm坐到9:00pm。故此，到殯儀館前整個下午茶打打底，從網上搵到「平記」，因為見風評好似幾好。

一入門口，估唔到近乎滿座，只喺得對搭枱卡位，而餐廳環境都幾逼吓，用啲大大小小嘅膠板做間隔，其實，對防疫都喺做個樣而已。

而小弟坐晌卡位，有部份卡位專登加多塊膠板晌枱中間隔開兩邊，喺方便搭枱做多少少生意，其實，我覺得都OK嘅。

本來，一心一意嚟嘆個菠蘿油，晌鋪面貼晌玻璃窗嘅下午茶餐，都有標有菠蘿油供應，但坐低後睇睇下午茶餐牌，竟然無咗，有點錯愕，既來之，則安之，就食份西多士。

而其他時段，餐廳仲有啲咩食物供應？兩頁外賣紙貼埋出嚟就一眼睇晒。 

餐具放晌枱邊櫃桶，差不多已然成為標準，之前晌其他食評都講過，呢個做法晌疫情期間就唔太好，唯有自行洗洗消毒，但更需留意嘅喺，就算唔喺疫情，個櫃桶就咁搵啲紙皮墊底，仲有唔少黑點同污漬，呢個就……！

西多士 $27

西多煎得有點焦香，而糖膠以膠樽成支咁上，落多落少可自行安排。依家出面好多做西多都喺夾有花生醬餡，但呢度就無嘅，單一厚少少嘅麵包（非台式類嘅厚多士），牛油都喺隨意一抹仔，整體嚟講，無話好差，亦無話好好。

熱奶茶

杯奶茶幾對評，入口茶味濃郁芳香，而茶奶比例合我心水，夠平衡，唔會話邊樣過於多；口感方面，都算滑嘅，但未至於如絲般滑。

今次嘅茶餐，當然有點失望，打算試菠蘿油，但無咗，所試嘅西多士，亦非預期，$27唔叫貴，但倒不如去某家快餐店，因為呢個價可以喺西多搭紅豆冰，哈哈，仲唔使坐到咁逼。

個人評分
味道：7/10
環境：6/10
服務：6/10
抵食：7/10
平均每人消費：HK$27

餐廳資料：
平記咖啡冰室
紅磡蕪湖街78號地下
3691 8336