凱柏冰室 K&P Cafe：「凱」景茶記

之前都講過，天氣熱都無阻我哋行山嘅熱情，但當然，揀嘅路線就唔可以太進取，所以，今次嘅路線較輕鬆，平路多，而最後會落到荃灣海濱一帶。行得山，就乘機嘆個下午茶先走，就沿海濱行到西鐵嘅新場「海之戀商場」時，見到呢一家「凱柏冰室」，對住海濱，感覺唔錯，就「以貌取人」走咗入去幫襯吓。

餐廳應該新開無耐，感覺環境新簇，裝修四正光猛，地磚有懷舊風，加上一邊對海濱嘅大窗，讓陽光完全透入嚟，份外醒神。由於疫情仲未完全消退，又有限聚令，所以，睇見幫襯嘅客人都好少。而且，店家、客人都好守規矩，量體溫、搓手消毒，且二人一枱。

餐具、調味包，都好似時下新派茶記咁，放晒晌枱面下嘅櫃桶，一拉就見到晒，自由取用。

雖然影低咗餐牌，但既然有外賣單張攞，就貼出嚟等大家睇得一目了然。由於限聚令關係，無既晚市，所以，都會主動提醒嚟食下午茶嘅人，5:45pm就需要還枱，避免任何尷尬。

丹麥午餐肉牛乳炒蛋三文治 $32

見個名寫住「丹麥」午餐肉，好想知吓有幾勁。先唔講啲午餐肉，啲炒蛋絕對好得，塞滿晒成份三文治，而且，啲蛋好嫩滑，炒功一流；餐肉亦唔喺啲劣貨，比較有肉香，感覺唔會好肥，而且，煎得有焦脆感。

即磨咖啡

今次幫襯嘅雖然喺茶記，但就唔飲奶茶，繼而試其即磨咖啡，因為佢晌餐牌中待別標明採用意大利金裝咖啡豆，咁就要幫襯喇。果然，啲咖啡有別港式，飲落確喺較為醇厚芳香。

雖然，今次嘅茶記下午茶唔喺菠蘿油，唔喺沙嗲牛包，但呢份餐蛋治亦唔失禮，落足料無欺場，加送海濱景 + 燦爛陽光，賣$32真心抵食。

個人評分
味道：8/10
環境：8/10
服務：7/10
抵食：8/10
平均每人消費：HK$32

餐廳資料：
凱柏冰室 K&P Cafe
荃灣大河道100號海之戀商場地下G01號舖
2122 9874