再推門進入餐廳，裝修比較簡單，餐廳以居酒屋定位，你話喺咪好有居酒屋氣氛，老實講，就一般般，除牆上掛有印上菜名嘅木牌之外，可以提升有居酒屋氣氛嘅裝飾就欠奉。最搞鬼，餐廳尾嘅大電視播放日本一啲綜藝節目，但餐廳音響就播緊廣東歌。
翻開餐牌，未講個二人前套餐之先，順便介紹吓有咩散點選擇，包括一系列前菜、沙律、刺身、壽司、魚生丼、卷物、西日料理煮物、拉麵、食事、揚物、天婦羅、燒物、串燒……等等，而當中刺身、壽司分別推出刺身盛、壽司盛，即喺拼盤，可以一次過優惠少少試多啲嘢。故此，選擇非常之多。
此外，時下甚流行嘅浜燒，佢哋亦一樣有做，仲賣到$238一人前，從餐牌所見，已有6款靚海鮮，單睇牌前就真喺好平，但抵唔抵食就要講埋海鮮啲質素。
而講到今晚所試嘅二人前季節限定套餐，由前菜、沙律、刺身、兩道一品料理、壽司、煮物，到甜點，一共8道菜，都只賣$398 + 10%。部份菜式無散點，好難比較平幾多，但刺身4點，搭兩道一品料理，壽司又4點，加個鮑魚煮物，淨喺呢幾樣都唔止依個價啦。咁多嘢食，廢話少講，即刻去片……。
前菜小食
店員話次次唔同，無特定款式，今晚喺味噌章魚，不過，章魚以外，仲有啲魚生粒同青瓜粒，味道稍濃，但不失鮮味，章魚又夠咬口。
蟹王蟹子沙律
蟹王喺乜？其實喺炸軟殼蟹，最估唔到喺份量，由青瓜絲、甘筍絲配沙律醬做成嘅沙律底，幾清爽，撈勻埋啲蟹籽，有點卜卜脆口感，而炸軟殼蟹入口唔油膩，整體真喺幾好食。
刺身
4款刺身分別喺三文魚、油甘魚、甜蝦、帶子，雖然喺套餐，冰鎮加上小擺設，一樣執得靚靚仔仔，喺心思同誠意。樣樣都兩件或以上，大家都一定每款都試到，而且，睇外觀啲刺身幾對辧，無話啞色咗呀，瘀瘀黑黑咁。
三文魚
色澤鮮橙亮麗，入口唔會好似未解凍咁硬冰冰，口感軟滑油潤，好食。
油甘魚
魚肉質感實淨啲，油脂跟三文相對少，但魚嘅味道濃啲，可以講喺實在啲。
甜蝦
同樣有質素，蝦肉幾爽口，蝦味無話超突出，但無花無假絕對鮮甜。
帶子
呎吋夠大碼，賣相都已覺有睇頭，並且顯出光澤，食落柔滑而爽甜。
鵝肝多士
膽固醇萬歲！美味萬歲！一客有兩件，件鵝肝大大件兼頗厚身，煎得甘香，外層微焦帶脆，入口油香到不得了。趁快食，多士既脆口，又滲有少少油脂，一口過夾埋兩者入口，豐腴感爆棚。
燒汁露筍牛肉卷
啲牛肉卷擺放得好精緻，而露筍採用露筍仔，鮮嫩無渣，牛肉薄薄捲一層，咬落唔會太厚肉，而啲牛肉本身又幾夠嫩腍，淋上燒汁，香濃惹味。
壽司
壽司又喺有4點，分別喺花之戀、池魚王、左口魚邊、蔥吞拿魚卷，做得的的骰骰，比晌一般廻轉壽司都仲要嚟得小巧。擺盤同樣花咗心思，竹葉、櫻桃蘿蔔片都喺計算過做出嚟嘅效果。整體用料鮮，尤其左口魚邊，油分足，有入口即溶嘅感覺，只喺個人就略嫌啲壽司飯捏得有少少鬆散。
磯燒鮑魚海鮮鍋
最後嘅海鮮鍋，有兩大隻磯燒鮑魚做壓軸，自然變得唔喺普通嘅海鮮鍋啦。其實，唔止有鮑魚，仲有青口、大蝦及沉晌底嘅帶子，所以，用料豐富，此外，啲鮑魚真喺掂喎，柔韌得嚟有咬口，又有鮑魚味，啲蝦鮮爽，帶子挺身鮮甜。底頭亦唔差，似喺醬油木魚湯，幾清甜。
甜點
無特別問店員甜品喺乜，而送上嚟喺兩粒軟心朱古力蛋糕仔，似心太軟但無流心，似班尼士但又軟身咗啲，其實，本身味道唔錯，好濃郁嘅朱古力味。但小弟建議擺兩粒和果子比起啲朱古力蛋糕仔更有意思！
個套餐評為抵食夾大件喺無庸置疑，因為食完真喺飽到上心口，如果3個女生點呢個餐，小弟都覺得夠食。此外，用料都算不賴，尤其刺身、多士、海鮮鍋，相信如果散叫以上菜式，價錢可能多6、7乘呀。
個人評分
味道：8/10
環境：7/10
服務：7/10
抵食：9/10
平均每人消費：HK$220
環境：7/10
服務：7/10
抵食：9/10
平均每人消費：HK$220
餐廳資料：
蕎道樂居酒屋 Gald Way Japanese Restaurant
銅鑼灣軒尼詩道499號永光商業大廈地庫
2140 6883
蕎道樂居酒屋 Gald Way Japanese Restaurant
銅鑼灣軒尼詩道499號永光商業大廈地庫
2140 6883
沒有留言:
發佈留言