其實大坑都好方便,從天后站行過嚟都哋十分鐘左右,況且,Bovini位處銅鑼灣道近街口,唔使入到咁深,離地鐵行幾步就到。餐廳地方唔大,屬小店形式,撞啱仲有批客訂咗一枱十幾人,擠滿成個場,夠晒熱鬧,幽暗嘅燈光,倍添氣氛。
侍應話佢哋仲喺試業關係,好多嘢仲調整緊,所以,餐牌都會不時有改動,更話如有咩意見不妨提出。細閱一轉餐牌,一面喺散點菜式,另一面喺套餐,不過,暫時只推出二人套餐(分$699、$799、$1,099三個價位)。
落好單,先嚟份麵包籃過吓口癮,一大個成個農夫包咁,問店員要啲牛油或橄欖油之類,佢話唔需要,因為個包喺香蒜法包。一大開,香蒜味湧出,熱辣辣,外皮好香脆,包心好綿密,充滿蒜香。
既然為羊扒而來,咁就梗喺揀$799包咗一份主菜嘅Deluxe Dinner Set啦,包兩客頭盤、兩客餐湯、一客主菜連伴菜,咪以為得一客主菜會唔夠食,其實份量唔嘢少。先睇睇兩客頭盤有啲乜!
雖然話喺經典,不過就重新演繹,凱撒沙律嘅幾款基本食材都包含其中,羅馬生菜、煙肉、烘包、巴馬臣……但就分途出擊。除生菜撈勻醬汁外,剛才所提嘅食材都可以相互配搭,其實,剔透嘅玻璃碗內,沙律都有放少少煙肉碎及麵包粒,表現番常見嘅凱撒沙律模樣。想講多少少,片煙肉炸得超香脆,卻一啲都唔油,我都喺就咁當薯片淨食。
之前講佢份量唔嘢少唔喺得個講字,另一道頭盤自家製蟹餅,大到成件扒咁,非常重型。落刀已感受到外層脆卜卜,咬落甘香唔油,而啖啖都食到絲絲蟹肉,絕無欺場,蟹肉嗒到當中鮮甜味,貨真價實。
仲喺怕少少油膩或熱氣嘅話,大可沾他他醬拌埋食,不過,小弟仲有個DIY建議,將啲香蒜法包加上蟹肉、他他醬,包你食落覺得滋味無窮。
餐湯有兩款:野菌湯及龍蝦湯,我估個個客都會試晒兩款,甚少人只試其中一款。
野菌味好突出,質感順滑,稀杰度啱唔好,似乎喺刻意打到仲有多幼細菌粒,所以,有點咬口感。而且,碗湯夠熱辣又大碗,真喺非常好飲,都咪講笑,飲完都幾有飽肚感。
近排與龍蝦湯都幾有緣,仲要次次都做得好飲,今晚晌度飲嘅一樣好掂,上枱已聞到蝦香。因為朋友揀試龍蝦湯,所以,小弟只試幾口,但已經飲得出蝦鮮味超濃郁,口感柔滑得緊要。
主菜有兩款,分別喺肉眼扒或羊架,亦可以加$200升級為澳洲和牛M6-7嘅西冷。牛扒較多食,亦好難得老友都鍾意食羊,所以,早已定好目標。
賣相唔多花巧,主要都喺配啲脆薯角,插支露絲瑪莉,但可以用震撼嚟形容,因為兩大件羊架真喺堅大件,估計夾埋都成磅重。汁醬嘅選擇有胡椒粟米汁、燒汁及荷蘭汁,原意喺想試荷蘭汁,因為除食賓尼廸蛋外,真喺未試過食扒嚟配佢,可惜,今晚無供應,當然有少少失望,唯有改配穩膽嘅燒汁。
件羊燒得好正,外層極有炭火嘅焦脆香,而切開,粉嫩嘅肉質一覽無遺,要求嘅五乘熟,燒得恰到好處,篤落去極富彈性,入口軟腍,因為羊脂唔太多,細嚼後羶味慢慢散發,唔會太霸道,喺羊痴必試,就算唔好羊嘅客人,亦可以小試幾口。
配菜有炒蘑菇、忌廉粟米及炸洋蔥圈,香口嘅 洋蔥圈喺我哋共同嘅心水,亦因為前兩者自己都整到,但洋蔥圈又要校粉漿、又要開油炸,較麻煩。洋蔥採用厚切,即喺個洋蔥環闊身啲,脆漿薄而香脆,入口又唔油,炸功上乘,啲洋蔥亦夠香甜,真喺讚一讚我哋無揀錯。
食完主菜,其實大家都見話飽,不過,女生外,男生一樣可以有第二個胃嚟容納甜品,我哋都嗜甜,就會一會賣成嚿水嘅熱熔朱古力餅「心太軟」。
唔怪得收成百銀,呎吋大到有兩個心太軟咁滯,雪糕亦睇到點點雲呢嗱籽,而且,入口軟滑又富奶香。講到個心太軟,流心效果唔錯,雖然唔叫得澎湃,但切開都大量朱古力漿流出,蛋糕帶點脆身,朱古力味濃,伴以雪糕、朱古力漿一齊食,感人滋味。
初時睇見餐牌,二人餐得一道主菜,有擔心過究竟夠唔夠食,不過,店員話佢哋份量十足,實夠食。睇見蟹餅、羊架嘅份量,就知交足貨。而且,用料高質,菜式又做得好有水準,值得一試嘅扒房小店。暫時所見,菜式選擇唔多,依家好多餐廳都款走「精選」路線,務求以貴精不貴多嚟取勝,又睇睇Bovini能唔能夠以扒做到吐氣揚眉。
個人評分
味道:9/10
環境:8/10
服務:8/10
抵食:7/10
平均每人消費:HK$500
味道:9/10
環境:8/10
服務:8/10
抵食:7/10
平均每人消費:HK$500
餐廳資料:
Bovini Steakhouse & Bar
大坑銅鑼灣道128號地舖
2886 9381
Bovini Steakhouse & Bar
大坑銅鑼灣道128號地舖
2886 9381
沒有留言:
發佈留言