佳佳甜品：米芝蓮的「佳」梯？

同老婆晌佐敦食完飯，跟住心血來潮話好耐無食過「佳佳甜品」，所以，專登行過嚟睇下「佳佳」多唔多人等位。你都見真喺少有地唔多人，一陣就有位，所以，就入去食碗糖水後先打道回府。

搬咗新舖都未嚟過幫襯，講得新舖自然裝修比較新簇，亦都好雅緻，不過好老實講，環境就幾逼吓，座位有限，所以，搭枱喺必然。

門口就有個巨型電子餐牌，喺門口等候期間就順便睇定食乜嘢，一入去坐低就掃碼落單。

芋蓉蓮子西米露加湯圓 $37
老婆都算喺芋頭控，故此，一眼就睇中呢一款糖水，芋蓉糖水底做得唔錯，幾有芋頭香，質感亦都幼滑，西米煙韌有咬口，個人覺得西米就偏少，而且，蓮子亦廖廖無幾；至於啲湯圓又點呢？外皮 幾柔韌，唔黏牙，芝麻餡炒得香，呢個糖水啱晒老婆口味。

冰花燉雞蛋 $31

小弟就覺得天氣涼涼哋食返碗冰花燉蛋就最窩心，不過嚟都有啲失望，一來個燉蛋唔熱，微暖而已；二來個口感唔喺滑嘟嘟，口感比較實淨；三來蛋香一般般，真喺比預期有較大落差。

「佳佳」賣嘅都喺較傳統嘅中式糖水店，無咩古靈精怪嘢，做咗咁多年都屹立不倒，自然有佢本事，小弟向來都唔太信米芝蓮或啲乜乜乜食家推介，始終人人口味唔同，不過，今晚食到嘅就好壞參半。

個人評分
味道：6/10
環境：6/10
服務：7/10
抵食：7/10
平均每人消費：HK$34

餐廳資料：
佳佳甜品
地址：佐敦白加士街113-115號地舖
電話：Nil