Bay’s Kitchen & Bar：半自助賀聖誕

以往同老婆家人主要做冬，甚少搞咩慶祝聖誕，不過，之前行山經過呢間「華麗海灣酒店」，睇到酒店內嘅餐廳「Bay' Kitchen and Bar」聖誕有啲半自助午餐，價位唔貴，半自助就更啱老婆，所以，趁「拆禮物日」約埋嚟食個午餐，之後，因佢妹夫喺車手，再同場加映落西九文化區感受吓聖誕氣氛。

其實呢間餐廳好多年前嚟講食嘢，當時叫「Anchor’s Seafood and Beer House」，酒店仲喺做緊服務式住宅嘅「汀蘭居」，但已差不多喺10年前嘅事。環境方面，印象中好似無太大變化，對外喺一列落地玻璃窗，而外面仍設有露天位，坐出面對住汀九橋個景幾唔錯，但室內位亦唔差，地方闊落，感覺舒服寫意。

題外話，酒店嘅位置確喺有啲隔涉，我哋有人揸車就梗喺無問題啦，但自己入嚟都方面，有穿梭巴士往來荃灣站及荃灣西站。雖然講明喺只限持有效匙卡嘅客人，但問過有位多都會俾餐廳客人使用。

講番價錢，今日喺拆禮物日，會平少少，成人只喺$198，主菜有5款選擇，已包齊雞牛豬羊同魚類，應該滿足到絕大部份人嘅要求。

我哋好早到，趁未開始先影定自助餐部分有咩食。主要有沙律吧、冷盤嘢、餐湯、麵包、芝士盤，仲有少少熱盤小食、意粉、甜品……等等，睇落唔算好高檔嘢，但樣樣有啲，頭盤DIY已經好足夠。

而飲品則有蘋果汁、橙汁、啡茶，全自助，小弟就鍾意初段果汁襯吓沙律、冷盤，尾段就撳杯拿鐵，搭一碟「甜品拼盤」。

沙律、生果

第一碟小弟喺必然揀沙律同生果嚟開開胃，大體而言，雖然沙律吧及唔上啲星級酒店，但樣樣夾啲，要砌嘅都可以砌到一大碟豐富「頭盤」，食材都算新鮮，加啲藜麥同三文然，既健康，又有營養，襯埋杯橙汁，已經可以當到一啲健康人士嘅午餐。

餐湯、麵包、小食

餐湯有中式、西式，老婆試咗中式覺得唔錯，小弟就揀咗西式嘅菠菜忌廉湯，再搭個小麥包、車打芝士，仲貪心拎咗件香口炸魚柳同春卷。啲小食一般般啦，無話特別唔特別；而個忌廉湯就幾香滑，有淡淡嘅菠菜味。

冷盤、凍海鮮
呢度就無咩貴價嘅凍海鮮嘢，不過，啲凍蝦、青口同海蜆算喺唔錯，食到有啲鮮味，唔會淡而無味，或者啲肉霉；冷盤嘢就普通啲、大路啲嘅貨色，好似螺肉、八爪魚、八雲鳳爪，有胃納嘅就不妨試吓，食唔到咁多嘢就可以飛咗去。

焗海鱸魚柳伴海鮮配龍蝦汁

我哋一行6人各有心水，老婆一向喺煎魚控，加上飲食上向來少肉，所以，一早就揀定海鱸魚柳，睇外觀就煎得好靚仔，入口老婆大讚真喺煎到皮脆肉滑，有魚鮮味；配菜亦精彩，有甘筍薯蓉、扒意大利青瓜及西蘭花，前者搓得幼滑富甘筍香，後者青瓜及西蘭花煎得恰到好處，咬落仲爽爽哋口。

慢煮紐西蘭羊膝

雞牛豬都比較多機會食，而且，小弟本身都鍾意食羊，所以，順利成章揀羊膝。唔喺講笑，件羊膝堅大嚿，好厚肉，因為利用慢煮關係，啲肉好嫩滑，而且，因為喺膝部，脂肪唔多，羊羶味唔重，伴菜喺忌廉薯蓉及雜菜，煮得好食，食完仲好飽肚添。

甜品拼盤

自助餐又好，半自助又好，可以食吓、抖吓、再食吓，去到尾聲自不然到甜品時間，對我哋啲甜魔而言，呢道嘅甜品算喺小巫，但對大多數人嚟講，又算喺唔錯，再配上一杯熱拿鐵；個人比較欣賞喺件綠茶蛋糕、朱古力慕絲餅、豆沙煎堆仔，如果有提供吓啲杯裝雪糕就更好。

始終呢間酒店唔喺食自助餐嘅熱門地方，所以，就算今日喺專為聖誕而設，但客人都唔算多，目測所見都喺30人之內，相對嚟講，我哋用餐就輕鬆寫意好多。而服務方面，亦算唔錯，啲侍應幾有禮，補充食物都快，此外，消費滿$300就有3小時免費泊車，夠晒用。

個人評分
味道：8/10
環境：9/10
服務：9/10
抵食：8/10
平均每人消費：HK$220

餐廳資料：
Bay’s Kitchen & Bar
地址：荃灣青山公路 - 汀九段123號華麗海灣酒店地舖
電話：2945 1152