艾卡邁 Ekkamai：邁出泰菜新天地

雖話香港飲食市道唔太好，不時有餐廳結業嘅新聞，正所謂有人辭官歸故里，有人漏夜趕科場，亦有不少新開嘅餐廳。今晚同老婆嚟到「女人街」嘅「艾卡邁」，除新開無耐之外，因為睇到網上資訊，知道大廚喺法國藍帶廚藝學校學過藝，又晌唔同大酒店做過，自然多份興趣想試。

走進餐廳，睇得出一派泰國街頭大排檔風，環境乾淨企理，牆上貼滿泰文海報、商品招紙……等等，氣氛輕鬆。而啲餐具、上菜用嘅碟……等等，同樣好街頭！

由於餐櫈喺啲方形木櫈，唔方便擺袋、擺背囊，所以，每枱下面都有個竹籃，俾客人擺嘢。

枱上放咗好些調味料，當然地道嘅泰國醬料就更加唔少得，而餐具放晌鐵盒之內，感覺會衛生好多。

餐牌就一大張A3印晒所有菜式，仲有一張喺推介，另一張喺其他飲品，中英泰文，亦有晒「冧把」，最正喺無加一嘛！而侍應都喺泰國人，佢哋之間溝通講泰文，但廣東話亦講得好正，落單唔怕溝通唔到，而且，亦好好禮貌。

泰式青木瓜魚沙律 $78

除泰國青木瓜，仲有甘筍絲、車厘茄同有啲生菜墊底，青木瓜絲、甘筍絲口感爽脆，醬汁酸酸辣辣，頗為開胃，不過，辣度幾勁吓，至於魚晌邊度？細問之下原來喺醬汁加咗啲發酵過嘅魚嚟做，帶微微鹹香味。

泰式豬肉沙嗲串 $68
沙嗲串有3串、6串可揀，得兩公婆嗌3串就夠啦，燒得靚仔，焦香吸引，入口確喺做到外脆內嫩，油脂豐腴，沾上特調醬汁，味道更豐富。不過，部份肉就肥多瘦少，就唔太對老婆胃口，我就OK，膽固醇萬歲。

青咖喱雞＄88
泰式咖喱一向都非常有特色，今次就揀咗個青咖喱配雞肉（仲有牛肉、豬肉可揀），個青咖喱同樣辣度有番咁上下，幾香、幾惹味，有微微椰香，而雞肉軟腍嫩滑，裡面仲有唔少豆角同茄子。本應叫咖喱，最好就搭啲薄餅撈汁食，不過，我哋揀咗個炒飯，打算用嚟撈汁。

招牌泰式蟹肉炒飯 $138

好幾款泰式粉麵麵想試，不過，呢款炒飯標注為招牌菜，自不然秤高少少。份量十足，個炒飯本來已炒得好有一手，飯粒分明不油膩，而飯內嘅蟹肉亦唔少，頗為鮮甜，加埋唧上少少青檸汁去提味，有份清新感，更好食。

龍眼冰 $28

雖然有供應芒果沙冰，但今次揀番龍眼冰，貪其清潤，糖水有份蜜香，啲龍眼亦香甜好食，而一邊飲住凍飲，一邊食住啲辣嘢，除幫吓小弟解辣之外，有種冰火之感，特別過癮。

越晏越多客人，估計有啲慕名而來，但有啲明顯喺鄉里嚟捧場，因為喺泰文交流，所以，唔望出女人街，真喺有少少錯覺嚟咗泰國喔！

個人評分
味道：8/10
環境：7/10
服務：9/10
抵食：8/10
平均每人消費：HK$200

餐廳資料：
艾卡邁 Ekkamai
地址：旺角通菜街36號地舖
電話：9391 5924