山區裡的走走趯趯: 紅葉茶屋 Momiji-Chaya：美食新一「葉」

2025年10月4日星期六

紅葉茶屋 Momiji-Chaya：美食新一「葉」

大概半年前到訪過「紅葉茶屋」嘅尖東分店，純粹因為老婆喺抹茶控，試吓佢哋嘅抹茶飲品同甜品。今回就行完山，由馬騮山返荔枝角，想起D2 Place都有間「紅葉茶屋」，就上去食個晏。

地方無尖東店咁大，但裝潢都喺以一室日系淺木色，裝修簡樸。此外，全店又多咗好多熊貓嘅相關裝飾，食住「熊貓經濟」條水，的確，啲熊貓又幾可愛。

餐牌上次都影過，今次就唔多再影，不過，睇落就好似無專為午市嘅餐牌。掃二維碼落單，埋單亦喺拎個二維碼出去搞。講到啲服務，我就覺得幾好，有禮，殷勤。

照燒三文魚定食 $138

老婆翻炒上次食過嘅照燒三文魚定食，一份定食包咗漬物、麵豉湯、日本米，夠豐富。先講講漬物，有蘿蔔同菠菜，前者爽脆帶點柚子味，好特別，後者腍滑清爽；麵豉湯亦做得唔錯，唔會過鹹，有麵豉香。至於啲三文魚，肉質柔嫩富油香，照燒汁比上次落得超多，飯粒黏糯有米香，整個定食都保持到水準。

壽司（8貫）配迷你櫻花蝦烏冬 $128

上次試咗個豪華海鮮丼茶漬飯，今次見有個限定，就試咗呢一款壽司配烏冬嘅定食。賣相精緻有睇頭，款式包括油豆腐、牡丹蝦、甘蝦、吞拿魚、三文魚、照燒鰻魚、帶子同白飯魚，食材夠晒新鮮，食得出嗰份鮮甜味，飯粒又捏得啱啱好。而碗烏冬話迷你咋，其實份量不少，烏冬滑溜有筋性，好咬口，仲落咗好多櫻花蝦，令個湯更富鹹鮮味。