銀龍粉麵茶餐廳 Ngan Lung Restaurant：我的星期六美孚早餐 ~ 圖個方便

有親戚回港，並安排今日再一齊返廣州探國內親友，搭高鐵返去超方便。但怕晌高鐵站嗰邊食早餐可能又貴、又多人，所以，晌美孚食完先落西九龍站。圖個方便，就揀咗離屯馬線近啲嘅「銀龍」，茶記選擇多，一定啱到大家。

餐廳格局都喺如一般茶記，以2人、4人卡位為主，我哋都揀到張挨窗嘅卡位，此外，仲有少少細圓枱，勉強坐到6人。

呢度無枱下櫃桶嘅「機關」，餐具、簡單調味料放晒晌枱面。

早餐選擇多多，真喺眼花繚亂，有啲更唔喺茶記見慣見熟嘅選項，如歐陸早餐、潮式粉麵、特色芝麻包餐……等等，平貴都有，豐儉由人。

A5 沙嗲牛肉麵配香滑炒蛋及法國牛角酥 $42

屋企人揀潮式粉麵，唔方影相就唔寫喇，小弟就例牌揀個沙嗲牛麵，仲配埋炒滑蛋，特別在於唔喺普通牛油餐包，而喺牛角酥，賣$42，都抵啦。份炒滑蛋算OK，唔算話好嫩滑，但就幾有蛋香，而牛角酥烘得金黃，咬落好鬆脆，幾夠牛油香。公仔麵煮得啱啱好，唔過腍就收貨喇，牛肉幾腍滑，不過份量唔多，沙嗲都俾得少，唔夠惹味。

熱奶茶
熱奶茶喺小弟嚟茶記嘅首選，睇落杯奶茶嘅色澤都OK，不過，雖然茶底芳香，但個人嫌奶味重咗少少，口感順滑度就一般般。

星期六朝，客人唔多，食完啲侍應都唔會催埋單，不過，今餐都喺求方便，食完就走，趕高鐵嘛。

個人評分
味道：7/10
環境：6/10
服務：7/10
抵食：8/10
平均每人消費：HK$42

餐廳資料：
銀龍粉麵茶餐廳 Ngan Lung Restaurant
地址：美孚美孚新邨萬事達廣場第七期地下N51號鋪
電話：2742 2226