世一冰室 Sai Yat Cafe：有姿「世」有實際

老婆話約咗朋友食飯，既然是夜無飯開，要食自己，當然「嗱嗱淋」趁機約啲老友出嚟短聚吓，食餐飯，傾吓偈。地點無所謂，茶記就最無負擔架喇，一來平靚正，二來啱我哋啲麻甩佬。

踏入餐廳，一室以湖水藍為主調，樓底亦較高，以茶記而言，空間感很好，加上地方企理，夠光猛。話就話香港經濟唔好，但唔喺講笑，接近坐滿，聽到店員跟顧客啲對話，就知街坊多。

基本茶記設定，枱面放咗啲調味包，枱側枱桶就放滿餐具，排列整齊。

講到食物，茶記勁就勁在乜都有，由鐵板精選，到常餐、蔥油系列、日式蛋包飯、世一金牌炸雞、西式碟頭、秘製馬來咖喱、皇牌焗飯、意國風情、健康蒸選、鮮魚湯泡飯、小食，以及各款飲品。晌門口仲見到有啲二人小菜套餐、二人蒸餸套餐，定價亦好實惠。

羅宋湯

啲套餐寫明奉送基本熱飲，不過，落單無耐，店員就奉上例湯，真有心，雖然無得揀，喺羅宋湯，但我哋都啱飲，而且，味道夠濃，酸香醒胃，裡面又多料喎，真唔錯。

豉汁蒸倉魚 $70

老友向來食嘢比較健康，所以，瞄準晌健康蒸選度揀，餐牌都標明蒸魚需時15分鐘，食好嘢當然等吓無所謂。揀豉汁就特別惹味，條倉魚好大條，望落去色澤閃閃爧，食落去真喺蒸得啱啱好，啲肉無黐骨，而且，肉質挺身而嫩滑，又好有魚嘅鮮甜味，當然啲豉汁都好正，撈飯真喺無得輸。

話梅柚子梳打 +$9

老友話想試特別少少，就揀咗呢一杯梳打，有相你睇，真喺落咗好多柚子蜜，所以，佢話入口已好有柚子香，口感清爽，再將粒話梅篤爛去，再入口帶點酸咪咪嘅感覺，多添加一份酸香感，佢更建議食鐵板餐配呢個一流。

花膠三黃雞魚湯泡飯 $62

肥隔離枱啲鐵板餐咋咋聲，都想試試店家嘅鐵板餐，不過，顧及老友，我都揀咗個幾健康嘅鮮魚湯泡飯。雖然話泡飯，但上菜時喺湯飯分開上，所以，小弟倒大半碗飯落湯，小半碗就撈豉汁食。講番個泡飯，啲雞真喺幾滑，以為份量唔多，卻喺越食越有咁，個人而言，花膠都OK，再炆腍身啲就更好，且有很多菇菌，而魚湯滲入少少雞油，就更加正，伴上飯，真喺好味。

紅豆冰 +$9

朝早早餐飲咗咖啡，晏晝午飯整咗杯奶茶，夜晚就節制少少，改試紅豆冰，因為見佢加$9都唔喺貴。杯紅豆冰一睇就知有非常多紅豆，而且，煮得又綿，味道好清甜，撈勻啲奶水，好飲又好食。

雖然兩個人試嘅嘢唔多，但都食到有質素，招呼又唔錯，地方企理，食茶記好就好在又無加一，所以，真喺值得翻兜。

個人評分
味道：9/10
環境：8/10
服務：9/10
抵食：9/10
平均每人消費：HK$75

餐廳資料：
世一冰室 Sai Yat Cafe
地址：長沙灣順寧道253至263號恆寧閣地舖
電話：2668 3898