銀龍冰室 Ngan Lung Cafe：早鳥晚飯

趁天氣唔錯，同老婆行咗轉短山，美孚起步就咁上馬騮山，終點就落番石籬一帶，嚟到石籬商場，見到「銀龍冰室」仲有下午茶餐（供應到6:30pm），就食個早鳥晚飯先。

唔好單睇門面，裡面原來都幾大，屈個彎仲有一大截用餐區，夠光猛，啲位又唔算逼，加上喺茶市尾，又未到晚飯時間，所以，客人唔多，感覺更靜侷。

下午茶有好多選擇，豐儉由人，而因為我哋當晚餐咁食，所以，揀咗啲碟頭嘢。

美極乾炒牛河 $49
雖然個菜式名冠以美極，但好老實講，食落我就真喺唔喺好覺有美極嗰種味道，但整體嚟講味道喺唔錯嘅，都幾有鑊氣，不過，第一就喺炒得比較油，第二牛肉嘅份量偏少，都喺大概3、5嚿左右，而且，無乜牛味。

鮮茄焗豬扒意 $51

老婆嘅焗豬扒意粉睇外觀幾唔錯，初頭望落去仲以為啲意粉會有過腍嘅情況，但食落又OK喎，而啲豬扒都幾鬆化，但就較為薄身咗，至於個湯底 佢就話喺鮮茄，見唔到一嚿嚿嘅蕃茄肉之餘，少咗份鮮活感，感覺只喺用啲茄醬、茄膏打成。

熱奶茶、熱檸水

嚟到茶記，嚟嚟去去都喺飲嗰啲啦，小弟嘅慣性就喺奶茶，今次呢杯色澤比較淡，其實入口茶味喺OK嘅，只喺覺得落奶多咗，奶味略嫌重咗少少。

食完嘅感覺就喺質素普普通通，只喺地方相對好坐。唔介意行多少少落去和宜合道嗰邊，仲多個性小店茶記選擇，相信味道會仲好啲。

個人評分
味道：7/10
環境：8/10
服務：7/10
抵食：7/10
平均每人消費：HK$50

餐廳資料：
銀龍冰室 Ngan Lung Cafe
地址：葵涌大隴街110號石籬商場二期地下B004-B005號舖
電話：2618 0168