山區裡的走走趯趯: The Cockloft：滋味觸「閣」

2023年3月24日星期五

The Cockloft：滋味觸「閣」

今日約咗個都耐無見嘅舊同學出嚟食晏晝，就番小弟工作區域，梗喺晌番中環食啦，地點當然由小弟負責揾！好彩呢個舊同學咩都食，所以搵起嚟都容易，難得聚聚舊都會搵間餐廳可以坐耐少少傾吓偈，故此，就過到嚟蘭桂坊主打法國菜嘅「Cockloft」，因為睇見食友嘅食評，指其性價比甚高，就探訪一吓這個「小閣樓」。

餐廳以法式小館作設計，門面已擺咗好多小盆栽，而內裡亦見不少植物，有種森系嘅小清新。餐廳樓高兩層，地方唔算大，地下主要喺廚房重地，開放式廚房可以睇到師傅做菜嘅實況，前面有少少座位。

而旁邊嘅旋轉樓梯就上二樓，上層就比較多啲位，但樓底會稍矮，高大嘅客人最好就揀坐下層。裝修比較簡約，唔太花巧，四周都會擺吓啲植物作點綴，所以，都有一份悠閒感。

午市嘅套餐分兩大類，一類喺主食配上配炒蛋、藜麥沙律菜、車厘茄、紫蕃薯及是日餐湯，定價$86-$98，但飲品需另外加錢。

另一類就以前菜、湯品、主菜、配菜加甜品嘅組合形式，部分嘅主菜又用上高級啲嘅肉類，所以定價稍高$128-$238，同樣飲品都喺需要另外加錢。

慢煮特製雞胸午餐 $98

小弟就揀咗平嗰款套餐，整份套餐嘅賣相都幾豐富，而且睇得出製作好有誠意。是日餐湯喺野菌忌廉湯，推得好滑溜，菌味濃郁，真心好飲；沙律菜加咗藜麥，自然秤高少少，淋上嘅油醋味道醇香，加上沙律菜夠新鮮爽脆；炒蛋睇都知佢炒得嫩滑，又富蛋香；而主食嘅慢煮雞胸，賣相靚仔，食落有種鹹香味，亮點就喺肉質非常之嫩滑，完全突出到慢煮嘅賣點，就連配菜嘅紫薯蓉都好正，好有薯香，兼且粉甜幼滑。

美國豬上肩肉午餐 $138
舊同學就揀咗貴少少嘅套餐，樣樣嘢以小碟、小兜盛載，好的骰，有啲和風感。而呢個餐同樣好豐富，前菜有新鮮嘅田園沙律，不過，呢個喺配上胡麻汁，仲有莎樂美腸襯芝士粒，鹹香好食；主菜喺美國肩上豬肉，小弟都叉咗兩嚿嚟試下，肉質好鬆化，有肉香，襯上焦糖芥末汁，立時味道變得更具層次，配菜有大大碗幼滑帶點牛油鹹香嘅薯蓉，一定夠晒飽。至於是日甜品，原來就喺玻璃杯仔裡面嘅芋泥波波，芋泥綿蜜粉甜，咬落唔油膩。