稻香 Tao Heung：抵食之「稻」

細佬嘅生日飯，本應2月攪，因為老婆連續幾個星期都有好多堂上，所以就延到三月初先食。就返細佬妹都喺揀返石硤尾啲酒樓，費事佢哋咁頻撲，而過去幾年都喺去飯堂「多彩」，今次就改改「稻香」，因為貪佢有「一蚊雞」推廣，哈哈！

呢間晌全屋邨內嘅「稻香」，裝修方面都喺好傳統嘅港式酒樓，但就勝在地方大，樓底高，夠光猛，而且啲枱櫈排得唔算迫，所以，坐落感覺算幾舒服。我哋被安排坐咗入房，比出面大廳，相對靜侷少少。

晌度有好多嘅嘢都喺自助，就好似枱邊呢部機，其實喺自動加水、自動煲水嘅水煲，側邊仲有個位用嚟洗完碗筷後倒水用。所以，由煲水、斟茶、洗杯倒水都喺自己一腳踢 ，其實我覺得幾好架，唔使成日嗌侍應，有時人手少，佢哋都未必好快幫到你。

此外，就算喺酒樓，點菜落單一樣可以自己嚟。枱面嘅餐牌座就有個二維碼，掃一掃自己落單非常方便，而且落咗乜都一清二楚，又減少同侍應嘅言語錯誤，食完嘢亦唔需要叫侍應埋單，就咁直接出門口嘅櫃枱俾錢就搞掂。

菜單方便，一家人嚟都喺吓食晚飯叫啲小炒，呢度有好多優惠孖寶，不過大部分唔喺搭蝦，就龍蝦、鮑魚，呢啲我細佬妹都唔多啱食，所以，我哋都喺嗌番一啲家常小炒同埋睇睇有啲咩優惠咁，之前都講過「一蚊雞」就唔少得架啦，基本上目測所見，絕對喺枱枱都有叫。

一蚊雞 $1
份「一蚊雞」絕對無將貨就價，一大隻炸子雞放晌一個仿雞藍內，無花無假原隻俾你親自剪成小件，拿上手隻雞真喺熱焫焫熱到有少少熨手，所以，貪快就剪得大件啲。入口堅喺皮脆肉嫩，夠晒鹹香，非常好食，就算唔喺賣一蚊，正常價都食得過囉。

脆皮菠蘿咕嚕肉 $98

呢度菜差唔多次次同細佬妹食飯都叫，因為喺細佬嘅至愛菜式，餸飯就一流。講真啲古嚕肉裁得大大件，都算唔錯，酸酸甜甜，芡汁唔會太多，咬落外皮仲有啲脆口，肉質幾鬆化吓，可以講屬中上嘅水準。

西洋菜鯪魚球豆腐煲 $88
呢個煲仔菜可以當餸食，又可以當湯飲，一舉兩得。唔好睇佢覺得好少咁，其實都喺正常例牌份量，不過個鍋好巨型，所以變相搞到啲嘢好似好細份。裡面鯪魚球多，豆腐多，西洋菜亦多，而且啲鯪魚球真喺好有鯪魚味，又彈牙又爽口，西洋菜好鮮嫩，唔會話好老，當然個湯就唔會話好濃，清清淡淡都OK。

椒絲腐乳通菜 $78
照顧到老婆需要，都打底加多碟椒絲腐乳通菜，都算大碟，交足貨，通菜爽口，腐乳落得最有啲鹹香，椒絲吊出微微辣，喺一道頗惹味嘅蔬菜菜式。

白飯 $15

不得不講吓呢度啲白飯，我哋落單之後等咗一段幾長時間都未見有，問問阿姐，佢話啲白飯要蒸架，吓！我心諗唔喺煲定一大煲，就咁裝出嚟咩？原來真喺逐砵咁蒸，食落啲飯好軟熟，又有飯香。

「稻香」一向俾人嘅印像都喺低檔次少少嘅酒樓，以前晌美孚有家「稻舫」都叫好久唔久幫襯吓，而今次都事隔一長段日子喇，再幫襯嘅感覺真喺唔錯，反正一家人家常便飯而已，細佬妹一向對食無要求，簡簡單單佢哋覺得仲舒服，上啲高級酒樓仲覺得唔自在。

個人評分
味道：8/10
環境：8/10
服務：7/10
抵食：9/10
平均每人消費：HK$101

餐廳資料：
稻香 Tao Heung
地址：石硤尾石硤尾邨美禧樓地下106號舖
電話：8300 8139