是日就專誠嚟試一試呢一家英倫風嘅烤芝士三文治店，因為從網上睇到佢哋好幾款邪惡嘅出品，賣相既吸引，又合小弟口味，來一趟高質嘅享受。雖然地址標示「軒尼詩道英皇集團中心」，但靠近「灣仔道」一邊，都唔難搵。
鋪面以深藍為主調，踏進餐廳，一室白瓷磚，有種簡約嘅英倫風。由於主打都喺附近嘅寫字樓客，以外賣為主，所以，店內座位唔多。
晌等候期間，除咗碌手機，睇到黑板上嘅IQ題，你又識唔識呢？答中真喺有餐免費架。
除咗主打嘅烤芝士三文治之外，仲有英式炒蛋三文治、凱撒沙律卷、早晨全餐卷、牛油果大蝦煎蛋、酥皮批、迷你西多士、多款配菜、飲品……等等，另加$30就可以升做套餐，包一份配菜及飲品，非常划算。
此外，枱上仲放咗好多支醬汁，辣醬偏多，但都喺平常少見嘅，大可自由發揮，令你嘅三文治變得口味更獨特。
意式肉醬烤芝士三文治 $58、是日沙律+咖啡 $30
全部食物都喺即叫即做，就算個沙律都喺即場撈，無話一早整定晒，睇住師傅喺廚房認真製作，可謂慢工出細貨，所以，都要俾少少耐性都等多陣。成品賣相非常吸引，而小弟當然揀咗烤芝士三文治系列啦，再加$30升為套餐，選咗是日沙律同熱咖啡。
先行分享咗份烤芝士三文治，餐牌都寫明用上酸種麵包，並加入兩款芝士，而酸種包以牛油煎香咗，咬落非常之香脆，細嚼包身好有煙韌感，內裡夾上大量自家製肉醬，混入雙重芝士，濃香惹味，唔喺講笑，食完成份三文治，真喺好飽肚。
是日沙律雖然喺一般嘅田園沙律，加啲車厘茄、烘麵包粒，但淋上嘅油醋，師傅話加咗少少蔥油，喺炒洋蔥整三文治時嘅「副產品」， 令到個油醋添上少少蔥香，再者，啲沙律菜夠新鮮，入口清爽，好好食並且平衡番份邪惡三文治。
熱咖啡就唔算話有咩好特別，都喺以咖啡機即磨製作，不過飲落覺得啲豆都喺靚貨，所以咖啡好純厚，帶有少少果仁香。
真喺唔好睇以為食份三文治會唔夠飽，由於用料足，加上又放有芝士，所以，食完啲沙律加埋份三文治，絕對可以當到一份正餐呀！
個人評分
味道：9/10
環境：7/10
服務：8/10
抵食：9/10
平均每人消費：HK$88
餐廳資料：
Big Buns
地址：灣仔軒尼詩道288號英皇集團中心地下G16號舖
電話：N/A
沒有留言:
發佈留言